Буюк Британия Ўзбекистондаги «шотланд» компанияларидан хавотирда. Бу ҳақда The Times’да эълон қилинган мақолага таяниб, Spot хабар берди.
Мисол сифатида 2020 йилнинг кузида Жаҳон банки томонидан уч йилга «қора рўйхат»га киритилган NovoLine Resources компанияси келтирилган.
NovoLine Resources Ўзбекистон Соғлиқни сақлаш вазирлигининг анестезиологик ва респиратор ускуналарни етказиб бериш танловида ютиб чиққан. Харидларни молиялаштирган Жаҳон банкининг аниқлашича, компания қалбаки ҳужжатлар, жумладан, сохта молиявий ҳисоботларни тақдим этган.
«Буюк Британияда рўйхатдан ўтган компаниялар хорижда ноқонуний мақсадларда фойдаланилаётгани тўғрисидаги хабарлар тобора ортмоқда», — дейди депутат Элисон Тюлисс.
Мақола муаллифларининг ёзишича, NovoLine Resources аслида кимга тегишли эканлигини ёки Жаҳон банки молиялаштирган шартномалардан даромадни ким қўлга киритганини аниқлашнинг имкони йўқ. Фирманинг на сайти, на телефон рақами ва на электрон почта манзили бор. Компания Эдинбургдаги бинода рўйхатдан ўтказилган бўлиб, у ерда итларни парваришлаш бизнеси жойлашган.
Мақолада таъкидланишича, икки йил олдин бошқа бир халқаро ташкилот — БМТ Тараққиёт дастури Ўзбекистонда фирибгарлик схемаларини амалга оширган тўртта «шотланд» фирмасига санкция қўллаган. NovoLine Resources каби уларнинг барчаси масъулияти чекланган шериклик ёки SLP ҳисобланади. Бу каби корхоналарни интернетда икки минг еврога харид қилиш мумкин.
Изоҳ (0)