Davlat statistika qo‘mitasi ma’lumotlariga ko‘ra, 2021-yilning yanvar—fevral oylarida xorijdan O‘zbekistonga 528,5 ming tonna sement import qilingan.
Ta’kidlanishicha, bu ko‘rsatkich o‘tgan yilning mos davri bilan solishtirilganda 354,9 ming tonnaga ko‘p. 2021-yilning ikki oyida import qilingan sement hajmi 2020-yilda import qilingan sementning 1/5 qismiga teng.
O‘zbekiston sement import qilgan asosiy davlatlar:
- Qozog‘iston – 226,7 ming tonna;
- Qirg‘iziston – 159,5 ming tonna;
- Tojikiston – 134,3 ming tonna.
Avvalroq 2021-yil 1-apreldan 1-oktabrgacha sement mahsulotini (TIF TN kodi 2523) O‘zbekistonga olib kirishda bojxona bojining nol stavkasi qo‘llanilishi to‘g‘risida xabar berilgandi.
2020-yilning aprelida, mamlakatdagi karantin cheklovlari vaqtida hukumat narxlar oshib ketishi borasidagi ogohlantirishlarga qaramay, sement importini cheklagan edi. Natijada sement mahsulotlari o‘rtacha 25 foizga qimmatlashgan. Taqiq oradan bir oy o‘tgach yechilgan edi.
Iyul oyida sement olib kirish jarayonini soddalashtirib, uni erkin muomalaga oldingidek 28 kun ichida emas, balki 1-2 kun davomida kiritishga ruxsat bergan. Bu ayrim narxlarning barqarorlashishiga sabab bo‘lgan.
Mart boshida uy-joy qurilishi va ipoteka bozorini rivojlantirishga bag‘ishlangan yig‘ilishda bosh vazirning birinchi o‘rinbosari Ochilboy Ramatov Prezidentdan korxonalarga sement va metallni ishlab chiqaruvchilardan to‘g‘ridan to‘g‘ri sotib olishga ruxsat so‘ragan. U o‘z taklifini 2021-yilda qurilish ishlari hajmi ikki barobarga oshishi, qurilish materiallariga bo‘lgan talab esa narxning oshishiga olib kelishi bilan asoslagan. Shavkat Mirziyoyev taklifni yaxshilab o‘rganib chiqish va shaffof tizim yaratish zarurligini ta’kidlagan.
Izoh (0)