O‘zbekistonda koronavirusga chalinish bo‘yicha 2021-yilgi kunlik antirekord yangilandi — bir kunda 144 kishida kasallik tasdiqlandi

O‘zbekistonda 25-mart, payshanba kuni 144 kishida koronavirus infeksiyasi tasdiqlandi. Sog‘liqni saqlash vazirligi ma’lumotiga ko‘ra, bu 2021-yildagi yangi antirekorddir. Avvalgi antirekord (138) bir kun avval — 24-mart, chorshanba kuni qayd etilgan edi.

Yangi kasallanish holatlarining

• 1 tasi Buxoro viloyatida,
• 3 tasi Jizzax viloyatida,
• 4 tasi Namangan viloyatida,
• 13 tasi Samarqand viloyatida,
• 1 tasi Sirdaryo viloyatida,
• 1 tasi Xorazm viloyatida,
• 6 tasi Toshkent viloyatida,
• 115 tasi Toshkent shahrida

SSVning qo‘shimcha qilishicha, o‘tgan bir sutka davomida Qoraqalpog‘istonda bir kishi, Toshkent viloyatida 21 kishi, Toshkent shahrida esa 83 kishi, respublika bo‘yicha jami 105 kishi COVID-19 kasalligidan sog‘aygan. Sog‘ayish ko‘rsatkichi 98 foizni tashkil etmoqda.

“Ayni paytda tibbiyot muassasalarida davolanayotgan 1088 nafar bemordan 191 nafari og‘ir, 85 nafari esa o‘ta og‘ir ahvolda”, — deyiladi SSV axborotida.

O‘zbekistonda mart oyidan boshlab koronavirusga chalinish holatlari yana ko‘paya boshlagani munosabati bilan bir qator ta’lim muassasalari vaqtincha yopildi yoki ta’limni masofaviy shaklga o‘tkazdi. 1-apreldan ommaviy tadbirlarni o‘tkazishga ayrim cheklovlar o‘rnatilmoqda.