Namanganda zamonaviy klinika qurish uchun qishloq vrachlik punkti binosini bo‘shatishni so‘ragan shaxslar ikki bemor tomonidan kaltaklandi

Namangandagi qishloq vrachlik punktida bezorilik sodir etildi, deb xabar bermoqda IIV Tergov departamenti.

Ma’lum qilinishicha, 23-mart kuni soat 11:00 larda Chortoq tumani “Saroy” MFY hududida joylashgan qishloq vrachlik punktiga 33 yoshli M.Y. va 35 yoshli Sh.Y. kelib, ma’muriyatga ushbu binoni bo‘shatib berishni, ular zamonaviy klinika qurmoqchi ekanligini bildirgan.

U yerda davolanayotgan 37 yoshli F.T. va 31 yoshli A.M. ularni turli so‘zlar bilan haqorat qilib, tanasining duch kelgan joyiga urib, jarohat yetkazgan. Sud tibbiy ekspertiza xulosasida M.Y. hamda Sh.Y.da yengil turdagi tan jarohatlari mavjudligi ko‘rsatilgan.

Holat yuzasidan Chortoq tuman IIB huzuridagi Tergov bo‘linmasi tomonidan F.T. va A.M.ga nisbatan Jinoyat kodeksining 277-moddasi 2-qismi “b” bandi (bir guruh shaxslar tomonidan bezorilik sodir etish) bilan jinoyat ishi qo‘zg‘atilib, gumon qilinuvchi tariqasida jalb qilingan.

Hozirda tergov davom etmoqda.

Departament bu turdagi jinoyatlar uchun Jinoyat kodeksining normalariga ko‘ra, 300 soatdan 360 soatgacha majburiy jamoat ishlari yoki 1 yildan 3 yilgacha ozodlikni cheklash yoxud 3 yilgacha ozodlikdan mahrum qilish jazosi tayinlanishini eslatib o‘tgan.