O‘zbekistondan o‘z vaqtida olib chiqib ketilmagan Hummer H1 musodara qilinib, 301 mln so‘mga sotildi

Andijonda Rossiya fuqarosiga tegishli Hummer H1 musodara qilinib, 301 million so‘mga sotildi. Bu haqda “Daryo”ga MIB matbuot xizmati xabar berdi.

Ma’lum qilinishicha, Rossiya fuqarosi Sh.T. Hummer H1 rusumli transport vositasini 2019-yilning 29-sentabrida “Do‘stlik” chegara posti orqali O‘zbekistonga olib kirgan.

U transport vositasini 2019-yilning 27-dekabriga qadar O‘zbekiston hududidan olib chiqib ketishi kerak bo‘lgan. Ammo belgilangan muddatda Respublika hududidan olib chiqib ketmaganligi sababli unga nisbatan ma’muriy bayonnoma rasmiylashtirilgan.

Andijon shahar Ma’muriy sudida 2020-yilning 25-dekabrida ma’muriy ish hujjatlari ko‘rib chiqilib, sud tomonidan Hummer H1 rusumli transport vositasi davlat foydasiga musodara qilingan.

Sudning mazkur qaroriga asosan MIBning Andijon shahar bo‘limi tomonidan ijro ishi qo‘zg‘atish to‘g‘risida qaror qabul qilinib, transport vositasi auksion savdolariga chiqarilgan.

O‘tkazilgan onlayn savdolar natijasiga ko‘ra, transport vositasi 301 million 158 ming so‘mga sotilib, savdodan kelib tushgan pul mablag‘lari davlat budjetiga yo‘naltirilgan.