Ўзбекистондан ўз вақтида олиб чиқиб кетилмаган Hummer H1 мусодара қилиниб, 301 млн сўмга сотилди

Андижонда Россия фуқаросига тегишли Hummer H1 мусодара қилиниб, 301 миллион сўмга сотилди. Бу ҳақда «Дарё»га МИБ матбуот хизмати хабар берди.

Маълум қилинишича, Россия фуқароси Ш.Т. Hummer H1 русумли транспорт воситасини 2019 йилнинг 29 сентябрида «Дўстлик» чегара пости орқали Ўзбекистонга олиб кирган.

У транспорт воситасини 2019 йилнинг 27 декабрига қадар Ўзбекистон ҳудудидан олиб чиқиб кетиши керак бўлган. Аммо белгиланган муддатда Республика ҳудудидан олиб чиқиб кетмаганлиги сабабли унга нисбатан маъмурий баённома расмийлаштирилган.

Андижон шаҳар Маъмурий судида 2020 йилнинг 25 декабрида маъмурий иш ҳужжатлари кўриб чиқилиб, суд томонидан Hummer H1 русумли транспорт воситаси давлат фойдасига мусодара қилинган.

Суднинг мазкур қарорига асосан МИБнинг Андижон шаҳар бўлими томонидан ижро иши қўзғатиш тўғрисида қарор қабул қилиниб, транспорт воситаси аукцион савдоларига чиқарилган.

Ўтказилган онлайн савдолар натижасига кўра, транспорт воситаси 301 миллион 158 минг сўмга сотилиб, савдодан келиб тушган пул маблағлари давлат бюджетига йўналтирилган.