Italiya sobiq bosh vaziri Silvio Berluskoni 22-martdan buyon shifoxonada davolanyapti. Bu haqda siyosatchining advokati Federiko Chekkoniga tayanib “RBK” xabar berdi.
84 yoshli Berluskoni 22-mart kuni tongda shifoxonaga yotqizilgan. La Repubblica nashrining yozishicha, advokat Milandagi sud majlisi paytida mijozining sog‘lig‘i yomonlashgani haqida xabar bergan. Sobiq bosh vazir hamda 28 kishi korrupsiya va yolg‘on guvohlik berishda ayblanmoqda.
Nashrning ma’lumotlariga ko‘ra, Chekkoni “bayonnomada Berluskoni dushanba kuni ertalab sog‘ligi yomonlashgani sababli kasalxonaga yotqizilgani qayd etilishi”ni aytgan. Lekin siyosatchining himoyachisi sud jarayonini keyinga qoldirishni so‘ramadi, shuning uchun ishni ko‘rib chiqish davom etmoqda.
Berluskoni 2020-yildan buyon uchinchi marta shifoxonaga yotqizildi. 2020-yilning sentabr oyida unda koronavirus va ikki tomonlama pnevmoniya aniqlandi, shundan keyin Milanning “San-Rafael” klinikasiga yotqizildi.
Yanvar oyida Italiya sobiq bosh vaziri Monakodagi kardiotorakal markaziga yotqizilgan edi, bu yerda siyosatchi 2016-yilgi operatsiyadan keyin o‘rnatilgan sun’iy aorta qopqog‘i tufayli muntazam tekshiruvlardan o‘tib turadi.
Forza Italia partiyasi yetakchisining advokati koronavirus infeksiyasi va yurakdagi muammolardan keyin Berluskoniga “to‘liq dam olish” kerakligini aytgan.
Izoh (0)