Италия собиқ бош вазири Сильвио Берлускони 22 мартдан буён шифохонада даволаняпти. Бу ҳақда сиёсатчининг адвокати Федерико Чекконига таяниб «РБК» хабар берди.
84 ёшли Берлускони 22 март куни тонгда шифохонага ётқизилган. La Repubblica нашрининг ёзишича, адвокат Миландаги суд мажлиси пайтида мижозининг соғлиғи ёмонлашгани ҳақида хабар берган. Собиқ бош вазир ҳамда 28 киши коррупция ва ёлғон гувоҳлик беришда айбланмоқда.
Нашрнинг маълумотларига кўра, Чеккони «баённомада Берлускони душанба куни эрталаб соғлиги ёмонлашгани сабабли касалхонага ётқизилгани қайд этилиши»ни айтган. Лекин сиёсатчининг ҳимоячиси суд жараёнини кейинга қолдиришни сўрамади, шунинг учун ишни кўриб чиқиш давом этмоқда.
Берлускони 2020 йилдан буён учинчи марта шифохонага ётқизилди. 2020 йилнинг сентябрь ойида унда коронавирус ва икки томонлама пневмония аниқланди, шундан кейин Миланнинг «Сан-Рафаэл» клиникасига ётқизилди.
Январь ойида Италия собиқ бош вазири Монакодаги кардиоторакаль марказига ётқизилган эди, бу ерда сиёсатчи 2016 йилги операциядан кейин ўрнатилган сунъий аорта қопқоғи туфайли мунтазам текширувлардан ўтиб туради.
Forza Italia партияси етакчисининг адвокати коронавирус инфекцияси ва юракдаги муаммолардан кейин Берлусконига «тўлиқ дам олиш» кераклигини айтган.
Изоҳ (0)