Birlashgan Arab Amirliklarida Dubay moliya vaziri, Dubay amiri Muhammad ibn Rashid Al Maktumning akasi Hamdan ibn Rashid Al Maktum vafot etdi. Bu haqda amir o‘z Twitter sahifasida e’lon qildi, deb yozmoqda “RBK”.
“Biz Allohnikimiz va barchamiz unga qaytamiz. Alloh mehriboning bo‘lsin, akam, tayanchim, do‘stim”, — deb yozgan u.
The National gazetasining xabar berishicha, 2020-yilning oktabr oyida 75 yoshli Hamdan Al Maktum chet elda operatsiya qilingan edi. Mart oyining boshida reabilitatsiya kurslaridan keyin u Dubayga qaytgan. Operatsiya tafsilotlari va u amalga oshirilgan joy haqida ma’lumot berilmagan.
Hamdan Al Maktum 1990-yilda vafot etgan Dubay amiri shayx Rashid ibn Said Al Maktumning ikkinchi o‘g‘li. U 1971-yili BAAda birinchi vazirlar mahkamasi tashkil etilganidan buyon Moliya vazirligini boshqargan.
Gulf News’ning yozishicha, o‘tgan asrning 70-yillaridan boshlab Hamdan Al Maktum amirlik sanoatini, Dubay munitsipalitetini, mahalliy Savdo palatasini va bir nechta davlat tashkilotlarini boshqargan.
Avval shayx Xalqaro valyuta jamg‘armasi va Neft eksport qiluvchi mamlakatlar tashkilotida (OPEK) Dubayning rasmiy vakili bo‘lgan. Bundan tashqari, shayx Hamdan Al Maktum 1995-yildan ukasi, Dubay amiri va shu bilan bir vaqtda Dubay bosh vaziri Muhammadga o‘rinbosarlik qilgan.
2006-yili u dunyoda birinchi bo‘lib London Qirollik kollejining uchta diplomini, shuningdek, tibbiyot stipendiyasini olgan. Shayx tibbiyot sohasida har yili topshiriladigan xalqaro Sheikh Hamdan Bin Rashid Al Maktoum Award for Medical Science mukofotining asoschisi hisoblanadi.
Izoh (0)