O‘zbekiston va Qirg‘iziston o‘rtasida davlat chegarasini delimitatsiya va demarkatsiya qilish bo‘yicha Qirg‘iziston hukumati delegatsiyasi rahbari — Qirg‘iziston Milliy xavfsizlik davlat qo‘mitasi raisi general-leytenant Qamchibek Tashiyev 22-mart kuni Toshkentga uchib keldi, deb xabar beradi qo‘shni mamlakat hukumati matbuot xizmati.
Tashrif davomida ikki mamlakat hukumati delegatsiyalarining Qirg‘iziston—O‘zbekiston davlat chegarasini delimitatsiya va demarkatsiya qilish bo‘yicha qo‘shma yig‘ilishi ham bo‘lib o‘tadi.
Hukumatlararo degalatsiya yig‘ilish 24—25-mart kunlari Toshkent shahrida bo‘lib o‘tadi. O‘zbekiston tomonidan delegatsiyaga bosh vazir Abdulla Aripov boshchilik qiladi.
Ta’kidlanishicha, uchrashuv davomida hukumat komissiyalari o‘zbek—qirg‘iz davlat chegarasining qolgan uchastkalarini delimitatsiya qilishni muhokama qiladi.
Eslatib o‘tamiz, 11-mart kuni Shavkat Mirziyoyev Qirg‘iziston prezidenti Sadir Japarovni qabul qilgandi. Uchrashuvda 2017-yil 5-sentabrda imzolangan O‘zbekiston–Qirg‘iziston davlat chegarasi to‘g‘risida shartnomaning tarixiy ahamiyati qayd etilib, mazkur chegaraning qolgan qismlarini ham delimitatsiya qilish maqsadida Hukumatlararo komissiyaga muzokaralarni faollashtirish bo‘yicha ko‘rsatma berilgan.
Izoh (0)