Андижон вилоят халқ таълими бошқармаси бошлиғи Азизбек Миркомилов мактабда ўқитувчи ўқувчини калтаклагани акс этган видеога муносабат билдириб, вилоятдаги айрим ўқитувчилардан тизимни шарманда қилишни бас қилишни сўради.
2021 йилнинг 21 март куни ижтимоий тармоқларда мактабда ўқитувчи ўқувчини калтаклагани акс этган видео тарқалди. Ҳолатга муносабат билдирган Асака туман халқ таълими бўлими воқеа тумандаги 49-мактабда содир бўлганини, бошланғич синф ўқитувчиси бўлган М.I. шу мактабнинг 4-синфида ўқувчи ўғлини калтаклаганини, ҳолат юзасидан Асака тумани вояга етмаганлар комиссиясига мурожаат қилинганини билдирди.
«Дарё» мухбирининг маълум қилишича, 22 март куни Андижон вилоят халқ таълими бошқармаси бошлиғи Азизбек Миркомилов ўзининг Facebook’даги саҳифасида ҳолатга муносабат билдирган.
«Ижтимоий тармоқларда мактаб ўқитувчисининг ўқувчини калтаклагани, мактаб директорининг тарқалган расмлари муҳокамаларга сабаб бўлди. Очиғи, мен байрамнинг қандай ўтганини ҳам билмадим. Нега, нима учун, ким сабабчи? Мактабдаги мазкур ҳолатлар даргоҳдан барака қочганлиги, ўқитувчиларнинг ўзаро келишмовчилиги директорнинг оқибатини ўйламасдан қилган ишлари натижасимикан, деган фикрлар келди. Бундай олиб қаралса, шу фикрлар тўғрилигини видео ва фотолар ҳам исботлаб турибди.
Ушбу ҳолатни кенг жамоатчилик билан муҳокама қиламиз. Ўқитувчи ва директорга чора кўрамиз, албатта. Лекин мактаблардаги шундай ҳолатлар қачонгача давом этади? Таълимнинг сифати буёқда қолиб, шахсий адоват туфайли тизимни шарманда қилишга бу ‘зиёлиларнинғ ҳақи бормикан?!
Ҳозирда ўқитувчининг дарсни сифатли ташкил этишдан бошқа иши қолмади-ку, ахир. Жамоат ишларига жалб қилинмаса, ойлик вақтида берилса, конспект ва бошқа ҳужжатлар камайтирилган бўлса, яна бизга нима керак?
Сизларга мурожаат қилар эканман, тизимни шарманда қилишни бас қилинг, дейман! Қайтараман, шахсий адоватингизни ишга аралаштирманг. Камчиликларимиз ва амалга ошириладиган ишларимиз жуда кўп. Агар бирлашиб уларни бартараф этмасак, Андижон таълими ривожланмай қолаверади», — деди вилоят халқ таълими бошқармаси бошлиғи.
Изоҳ (0)