Toshkentning Sergeli tumanida qattiq maishiy chiqindilarni saralagan holda to‘plovchi poytaxtdagi birinchi ko‘p tarmoqli punkt Hashar Week: Joy — Sergeli ochildi. Ochilish marosimi 18-mart kuni bo‘lib o‘tdi, deb xabar bermoqda “Gazeta.uz”.
Ushbu punktda chiqindi qog‘oz, PET (polietilentereftalat) va plastmassa qabul qilinadi. Qabul dushanbadan shanbagacha soat 16:00 dan 19:00 gacha Yangi Sergeli ko‘chasi, 127 uy (yo‘l bo‘yida) manzilida amalga oshiriladi.
Hashar Week ijtimoiy loyihasi muallifi va rahbari Suna Park bu “ko‘p tarmoqli jamoat joyi” ekanligini ta’kidlagan. Ochilish kunida u yerda bolalar uchun “Men Sergelini qanday tasavvur qilaman” rasm chizish bo‘yicha master-klass o‘tkazilgan.
Loyihaning asosiy maqsadi aholini ekologik va umuman madaniyat bilan tanishtirishdir. Tashabbuskorlar turli tadbirlar, mahorat darslari, ochiq ma’ruzalar va filmlar namoyishini o‘tkazilishni rejalashtirmoqda.
Sergeli tumani hokimi Elbek Shukurov tumanni obodonlashtirish doirasida ko‘chalarda chiqindi qutilari sonini ko‘paytirish rejalashtirilganini bildirgan.
“Shahar hokimi, Prezident tashabbusi bilan har bir mahalla uchun 1 milliard so‘mdan ajratilgan. Bundan tashqari, tuman hokimligida o‘z mablag‘larimiz bor... Yo‘llar, piyodalar yo‘laklarini tekislash, bolalar va sport maydonchalarini tiklash rejasi bor edi. Bundan tashqari, unga chiqindi qutilari, o‘rindiqlar va boshqa narsalarni qo‘shdik... Chiqindi yig‘ish punktlarini maqbul joyda bo‘lishini ta’minlash maqsadida uni to‘liq qayta ko‘rib chiqyapmiz”, — degan Elbek Shukurov.
Uning so‘zlariga ko‘ra, 2021-yilda 33 ta mahallani (oyiga 7-8 ta mahalladan) obodonlashtirish rejalashtirilgan: “Avgustgacha hamma ishlarni tugatamiz. Hamma joyga chiqindi qutilarini o‘rnatamiz. Muayyan joylarda u yetarli bo‘lmasligi mumkin, ammo boshlash uchun bizda mablag‘ va rejalar bor”.
“Biz bu joy chiqindi yig‘ish punktidek tasavvur uyg‘otmasligini, bino arxitekturasining o‘zi ikkilamchi chiqindini qayta ishlash muammosi haqida o‘ylantirishga majbur qilishi haqida o‘yladik… Shu maqsadda o‘rindiqlar, arg‘imchoqlar o‘rnatib, kitob almashinuv javonini qo‘shdik. Qurilish jarayonida ikkilamchi materiallardan foydalanilgan”, — degan qabul punkti dizayni muallifi va ARK arxitektura byurosi asoschisi Bobur Qilichev.
Eslatib o‘tamiz, Toshkentda 2021-yildan chiqindilarni saralab yig‘ish boshlanishi haqida xabar berilgan edi. Saralab yig‘ish tajribasi poytaxtdagi 24 ta mahalladan boshlanishi ma’lum qilingan.
Izoh (0)