Тошкентнинг Сергели туманида қаттиқ маиший чиқиндиларни саралаган ҳолда тўпловчи пойтахтдаги биринчи кўп тармоқли пункт Hashar Week: Joy — Sergeli очилди. Очилиш маросими 18 март куни бўлиб ўтди, деб хабар бермоқда «Gazeta.uz».
Ушбу пунктда чиқинди қоғоз, ПЭТ (полиэтилентерефталат) ва пластмасса қабул қилинади. Қабул душанбадан шанбагача соат 16:00 дан 19:00 гача Янги Сергели кўчаси, 127 уй (йўл бўйида) манзилида амалга оширилади.
Hashar Week ижтимоий лойиҳаси муаллифи ва раҳбари Суна Парк бу «кўп тармоқли жамоат жойи» эканлигини таъкидлаган. Очилиш кунида у ерда болалар учун «Мен Сергелини қандай тасаввур қиламан» расм чизиш бўйича мастер-класс ўтказилган.
Лойиҳанинг асосий мақсади аҳолини экологик ва умуман маданият билан таништиришдир. Ташаббускорлар турли тадбирлар, маҳорат дарслари, очиқ маърузалар ва фильмлар намойишини ўтказилишни режалаштирмоқда.
Сергели тумани ҳокими Элбек Шукуров туманни ободонлаштириш доирасида кўчаларда чиқинди қутилари сонини кўпайтириш режалаштирилганини билдирган.
«Шаҳар ҳокими, Президент ташаббуси билан ҳар бир маҳалла учун 1 миллиард сўмдан ажратилган. Бундан ташқари, туман ҳокимлигида ўз маблағларимиз бор... Йўллар, пиёдалар йўлакларини текислаш, болалар ва спорт майдончаларини тиклаш режаси бор эди. Бундан ташқари, унга чиқинди қутилари, ўриндиқлар ва бошқа нарсаларни қўшдик... Чиқинди йиғиш пунктларини мақбул жойда бўлишини таъминлаш мақсадида уни тўлиқ қайта кўриб чиқяпмиз», — деган Элбек Шукуров.
Унинг сўзларига кўра, 2021 йилда 33 та маҳаллани (ойига 7-8 та маҳалладан) ободонлаштириш режалаштирилган: «Августгача ҳамма ишларни тугатамиз. Ҳамма жойга чиқинди қутиларини ўрнатамиз. Муайян жойларда у етарли бўлмаслиги мумкин, аммо бошлаш учун бизда маблағ ва режалар бор».
«Биз бу жой чиқинди йиғиш пунктидек тасаввур уйғотмаслигини, бино архитектурасининг ўзи иккиламчи чиқиндини қайта ишлаш муаммоси ҳақида ўйлантиришга мажбур қилиши ҳақида ўйладик… Шу мақсадда ўриндиқлар, арғимчоқлар ўрнатиб, китоб алмашинув жавонини қўшдик. Қурилиш жараёнида иккиламчи материаллардан фойдаланилган», — деган қабул пункти дизайни муаллифи ва АРК архитектура бюроси асосчиси Бобур Қиличев.
Эслатиб ўтамиз, Тошкентда 2021 йилдан чиқиндиларни саралаб йиғиш бошланиши ҳақида хабар берилган эди. Саралаб йиғиш тажрибаси пойтахтдаги 24 та маҳалладан бошланиши маълум қилинган.
Изоҳ (0)