O‘zbekiston xalq yozuvchisi Xudoyberdi To‘xtaboyev 88 yoshida olamdan o‘tdi, deb xabar beradi Yozuvchilar uyushmasi.
Xudoyberdi To‘xtaboyev 1932-yil 17-dekabr kuni Farg‘ona viloyatining Katta Tagob tumanida dunyoga kelgan. U erta yetim qolib, bobosi va buvisining qo‘lida tarbiya topgan.
“Arboblar.uz” saytining ma’lumotlariga ko‘ra, Xudoyberdi To‘xtaboyev 1949-yil Qo‘qon pedagogika institutini, 1955-yil Toshkent davlat universitetini (hozirgi O‘zbekiston Milliy universitetini) tamomlagan.
Ijodiy faoliyatini Farg‘ona viloyatidagi maktabda dars berishdan boshlagan, keyinroq o‘quv ishlari mudiri va maktab direktori lavozimlarida ishlagan
1958-yildan Xudoyberdi To‘xtaboyev keyingi 14 yil mobaynida “Toshkent oqshomi”, “Sovet O‘zbekistoni” gazetalarida 300 dan ortiq felyetonlari chop etilgan. Shuningdek, “Guliston”, “Sharq yulduzi”, “Gulxan”, “G‘uncha”, “Yosh kuch” jurnallarida, “Yosh gvardiya” va “Kamalak” bosma nashrlarida ijod namunalari bilan ishtirok etgan.
1958-yil qisqa vaqt mobaynida uning “Yosh gvardiya”, “Sir fosh etildi”, “Sehrli qalpoqcha” kabi kitoblari omma e‘tiboriga havola qilingan. Keyinroq “Omonboy va Davronboy”, “Sariq devni minib”, “Yillar va yo‘llar”, “Besh bolali yigitcha”, “Qasoskorning oltin boshi”, “Sehrgarlar jangi yoki shirin qovunlar mamlakatida”, “Jannati odamlar” kabi kitoblari chop etilgan.
Xorijiy kitobxonlar orasida Xudoyberdi To‘xtaboyev “Sehrli qalpoqcha” ertak-qissasining rus tiliga tarjimasi (shuningdek, ukrain, fransuz va bir qator boshqa tillar) bilan tanilgan. “Sehrli qalpoqcha” ertak-qissasi — yozuvchining rus tiliga tarjima qilingan birinchi kitobi. Ertak-qissa 1970-yilgi Butunittifoq tanlovida eng yaxshi bolalar kitobi mukofotiga loyiq topilgan.
Xudoyberdi To‘xtaboyevga O‘zbekistonda xizmat ko‘rsatgan madaniyat xodimi, O‘zbekiston xalq yozuvchisi unvonlari bilan taqdirlangan.
Eslatib o‘tamiz, 2020-yilda Sharof Rashidovning ukasi, O‘zbekiston san’at arbobi, taniqli pedagog olim, adabiyotshunos va tarjimon Asil Rashidov 90 yoshida, adabiyotshunos olim, filologiya fanlari doktori, professor Sanjar Sodiqov 80 yoshida, yozuvchi, dramaturg, publitsist, O‘zbekiston san’at arbobi Abduqahhor Ibrohimov 79 yoshida, jurnalist va yozuvchi Sotvoldi Rajabov 74 yoshida, yozuvchi Mamadali Mahmudov 79 yoshida olamdan o‘tgani to‘g‘risida xabar berilgandi.
Izoh (0)