Avval xabar berilganidek, 18-mart kuni O‘zbekiston Prezidenti Shavkat Mirziyoyev Chirchiqqa amalga oshirgan tashrifi davomida shahardagi xonadonlardan birida istiqomat qiluvchi Anifiya Bektoshova oilasida bo‘lgan. Anifiyaning ikki o‘g‘lidan biri Vladislav Denisenko uch yil oldin basseynga noqulay sakrab umurtqasi, oyog‘idan qattiq lat yegani, xokkey bilan shug‘ullanadigan yana bir o‘g‘lining ham oyog‘ida muammo borligi aytilgan edi.
20-mart kuni sog‘liqni saqlash vaziri Abduhakim Hojiboyev, Toshkent viloyati hokimi Davron Hidoyatov hamda bir guruh soha shifokorlardan iborat konsilium ushbu xonadonga keldi.
SSV vaziri Vladislav Denisenkoning ahvoli borasidagi ma’lumotlar bilan ulashdi.
“Vladislav bilan 2018-yilda yuz bergan baxtsiz hodisada Respublika ixtisoslashtirilgan neyroxirurgiya markazida yotqizilib, hamma muolajalar qilingan, hayoti saqlab qolingan. Lekin jarohat juda og‘ir bo‘lgani, bo‘yin sohasidagi orqa miya qattiq lat yegani uchun ikki oyog‘i, tananing pastki qismi, qisman yuqori, qo‘llarning harakatsizlanishiga olib kelgan. Bizning tilda parez, plegiya deyiladi hamda bu narsa uzoq vaqt reabilitatsiyani talab qiladi. U (Vladislav – tahr.) O‘zbekistonda ham, Rossiyada ham davolangan. O‘tgan vaqt ichida ozgina bo‘lsa ham, ijobiy o‘zgarish bor”, — deydi u.
Vazir ana shu ijobiy o‘zgarishni tezlashtirish uchun unga har tomonlama reabilitatsiya usullarini ishlatish, fizioterapiya, kinezoterapiya, zamonaviy maxsus yangi ishlab chiqarilgan jihozlardan foydalanish talab qilinishini bildirgan.
Shuningdek, Hojiboyev O‘zbekistonda Vladislav kabi baxtsiz hodisa natijasida nogiron bo‘lib qolgan, davolanishga yetarli mablag‘i yo‘q, muhtoj bemorlarga yordam ko‘rsatish uchun qanday choralar ko‘rilishi borasidagi rejalar haqida to‘xtalar ekan, tibbiy-ijtimoiy xizmatlar agentligi masalasida yangilik bilan bo‘lishgan.
Oxirgi vaqtlarda Prezidentimizning tashabbuslari bilan ijtimoiy himoya sohasiga juda katta ahamiyat berilmoqda. Hozir Sog‘liqni saqlash vazirligi Vazirlar Mahkamasi bilan birgalikda maxsus qaror tayyorlamoqda. Qarorga ko‘ra, ilgari SSV qoshida bo‘lgan Tibbiy-ijtimoiy xizmatlar agentligi faoliyati bevosita vazirlik maqomiga yaqinlashtirilib, Vazirlar Mahkamasiga o‘tkazilmoqda. Ya’ni, uni bosh vazir o‘rinbosari, ijtimoiy kompleks rahbari boshqarib boradi. Hududlarda esa bu hokimlarga topshiriladi, hokimlar ularni bevosita boshqaradi, ularga kerakli sharoit yaratib beriladi.Abduhakim Hojiboyev, sog‘liqni saqlash vaziri
Izoh (0)