Surxondaryo viloyatining Termiz tumanida avtomobillarga avtoturargoh qurish uchun davlat muhofazasiga olingan arxeologik hududdan tuproq qazigan tadbirkor ishini viloyat prokuraturasi o‘rganadigan bo‘ldi. Bu haqda viloyat hokimligi axborot xizmati ma’lum qildi.
Ma’lum bo‘lishicha, 2021-yilning 19-mart kuni ijtimoiy tarmoqlarda “Sen o‘tmishga tosh otsang, kelajak seni zambarakdan o‘qqa tutadi” sarlavhali xabar e’lon qilingan bo‘lib, unda buyuk alloma Varroq Termiziyning qabri va uning atrofi tekislanayotgani, hududda tadbirkor tomonidan avtomashinalar turar joyi qurilayotgani tilga olingan.
Mazkur xabarga munosabat bildirgan Surxondaryo viloyat hokimligi axborot xizmati Termiz tumanidagi “Qoratepa”, “Fayoztepa” “Termiz shohlar” saroyi kabi o‘nlab obidalarni qamrab olgan “Eski Termiz” arxeologik hududi 500 gektarlik maydonga egaligini, hudud Vazirlar Mahkamasi qarori bilan davlat muhofazasiga olinganini ta’kidlagan.
“Arxeologik hududni operativ boshqarish huquqi Termiz davlat muzey-qo‘riqxonasiga topshirilgan bo‘lib, hududda qurilish, ta’mirlash, tekislash va boshqa ishlarni amalga oshirish qat’iyan man etilgan. Miloddan avvalgi IX-X asrlarda yashab, faoliyat ko‘rsatgan ulug‘ alloma Abu Bakr Varroq Termiziy qabri ham ushbu arxeologik yodgorlik hududida joylashgan bo‘lib, Markaziy Osiyo xalqlari tarixida muhim o‘rin egallaydi.
Ammo Termiz shahrida faoliyat ko‘rsatayotgan Complex Technical Services MChJga avtotransport vositalariga texnik xizmat ko‘rsatish, avtomobillarga siqilgan gaz quyish kompressor stansiyasi hamda avtotransport vositalarining zamonaviy savdo majmuasi qurish uchun Termiz tumani ‘Yangiobod’ mahallasi hududidagi tuman zaxira fondidan 10 gektar yaylov yer-maydoni ajratilgan.
2021-yilning 19-mart kuni olib borilgan o‘rganishlar davomida o‘ziga ajratilgan yer maydonida qurilish ishlarini amalga oshirish uchun MChJ tomonidan 100 metr uzoqlikda joylashgan muhofaza hududning chegara qismidan o‘zboshimchalik bilan tuproq qazib olish ishlari olib borilayotgani aniqlandi”, — deyiladi hokimlik axborotida.
Viloyat hokimligi axborot xizmatining qo‘shimcha qilishicha, ayni kunda “Eski Termiz” hududidan tuproq qazib olish ishlari to‘xtatilgan. Biroq Varroq Termiziy maqbarasiga tutash yodgorliklarga qisman ziyon yetgan. Shu sabab muhofaza hududida noqonuniy ishlarni olib borgani uchun Complex Technical Services MChJga nisbatan o‘rnatilgan tartibda qonuniy chora ko‘rish bo‘yicha viloyat prokuraturasiga hujjatlar taqdim etilgan.