Toshkentda xorijdan mahsulotlar olib kelib berishini va’da qilib, fuqarodan 805 ming AQSh dollaridan ortiq pul olgan shaxs qo‘lga olindi, deya xabar bermoqda Tergov departamenti.
Ma’lum qilinishicha, 2020-yilning yanvar oyida 28 yoshli A.A. o‘zganing mulkini firibgarlik yo‘li bilan qo‘lga kiritish maqsadida Mirzo Ulug‘bek tumani Markaz-1 dahasi hududida 24 yoshli D.I.ga tadbirkorlik faoliyati bilan shug‘ullanishini aytgan.
U D.I.ga Rossiyadan arzon narxda yog‘och hamda Xitoydan pista mahsulotlari olib kelib, sotib, katta miqdorda daromad berishini va’da qilib, shu yo‘l orqali uning ishonchiga kirgan.
A.A. yanvar oyidan sentabr oyiga qadar bo‘lgan vaqt oralig‘ida davomida D.I.dan bo‘lib-bo‘lib jami 805 320 AQSh dollar pul mablag‘larini aldov yo‘li bilan qo‘lga kiritib, o‘z ehtiyojlari uchun ishlatib yuborgan.
Mazkur holat yuzasidan IIV huzuridagi Tergov departamenti tomonidan A.A.ga nisbatan Jinoyat kodeksining 168-moddasi 4-qismi “a” bandi (juda ko‘p miqdorda firibgarlik yo‘li bilan o‘zganing mulkini o‘zlashtirish) bilan jinoyat ishi qo‘zg‘atilib, gumon qilinuvchi tariqasida jalb qilingan.
Hozirda tergov harakatlari olib borilmoqda.
Bundan avval Navoiyda tadbirkorga tegishli yerni 150 ming dollarga sotishga uringan shaxs ushlangani, Qarshida o‘zini hokimlik xodimi deb tanishtirgan shaxs imtiyozli uy olmoqchi bo‘lgan ikki ayoldan jami 1000 dollar “uxlatgani” aniqlangani hamda Buxoro tumani hokimligi zaxirasidagi yerni 23,5 ming dollarga sotmoqchi bo‘lgan shaxs ushlangani haqida xabar berilgandi.
Izoh (0)