Аввал хабар берилганидек, 18 март куни Ўзбекистон Президенти Шавкат Мирзиёев Чирчиққа амалга оширган ташрифи давомида шаҳардаги хонадонлардан бирида истиқомат қилувчи Анифия Бектошова оиласида бўлган. Анифиянинг икки ўғлидан бири Владислав Денисенко уч йил олдин бассейнга ноқулай сакраб умуртқаси, оёғидан қаттиқ лат егани, хоккей билан шуғулланадиган яна бир ўғлининг ҳам оёғида муаммо борлиги айтилган эди.
20 март куни соғлиқни сақлаш вазири Абдуҳаким Ҳожибоев, Тошкент вилояти ҳокими Даврон Ҳидоятов ҳамда бир гуруҳ соҳа шифокорлардан иборат консилиум ушбу хонадонга келди.
ССВ вазири Владислав Денисенконинг аҳволи борасидаги маълумотлар билан улашди.
«Владислав билан 2018 йилда юз берган бахтсиз ҳодисада Республика ихтисослаштирилган нейрохирургия марказида ётқизилиб, ҳамма муолажалар қилинган, ҳаёти сақлаб қолинган. Лекин жароҳат жуда оғир бўлгани, бўйин соҳасидаги орқа мия қаттиқ лат егани учун икки оёғи, тананинг пастки қисми, қисман юқори, қўлларнинг ҳаракатсизланишига олиб келган. Бизнинг тилда парез, плегия дейилади ҳамда бу нарса узоқ вақт реабилитацияни талаб қилади. У (Владислав – таҳр.) Ўзбекистонда ҳам, Россияда ҳам даволанган. Ўтган вақт ичида озгина бўлса ҳам, ижобий ўзгариш бор», — дейди у.
Вазир ана шу ижобий ўзгаришни тезлаштириш учун унга ҳар томонлама реабилитация усулларини ишлатиш, физиотерапия, кинезотерапия, замонавий махсус янги ишлаб чиқарилган жиҳозлардан фойдаланиш талаб қилинишини билдирган.
Шунингдек, Ҳожибоев Ўзбекистонда Владислав каби бахтсиз ҳодиса натижасида ногирон бўлиб қолган, даволанишга етарли маблағи йўқ, муҳтож беморларга ёрдам кўрсатиш учун қандай чоралар кўрилиши борасидаги режалар ҳақида тўхталар экан, тиббий-ижтимоий хизматлар агентлиги масаласида янгилик билан бўлишган.
Охирги вақтларда Президентимизнинг ташаббуслари билан ижтимоий ҳимоя соҳасига жуда катта аҳамият берилмоқда. Ҳозир Соғлиқни сақлаш вазирлиги Вазирлар Маҳкамаси билан биргаликда махсус қарор тайёрламоқда. Қарорга кўра, илгари ССВ қошида бўлган Тиббий-ижтимоий хизматлар агентлиги фаолияти бевосита вазирлик мақомига яқинлаштирилиб, Вазирлар Маҳкамасига ўтказилмоқда. Яъни, уни бош вазир ўринбосари, ижтимоий комплекс раҳбари бошқариб боради. Ҳудудларда эса бу ҳокимларга топширилади, ҳокимлар уларни бевосита бошқаради, уларга керакли шароит яратиб берилади.Абдуҳаким Ҳожибоев, соғлиқни сақлаш вазири
Изоҳ (0)