Shavkat Mirziyoyev 18-mart kuni Chirchiqqa amalga oshirgan tashrifi davomida shahardagi xonadonlarning birida yashovchi Anife Bektoshova oilasida bo‘ldi. Qayd etilishicha, Anifening Vladislav ismli o‘g‘li uch yil oldin basseynga noqulay sakrab umurtqasi va oyog‘idan qattiq lat yegan.
Yigit Prezidentga reabilitatsiya uchun yordam kerakligini, biroq davolanishda asosan o‘zi harakat qilishi lozimligini, sog‘ayishi organizmiga bog‘liqligini ta’kidlagan. Shu bilan birga, u davolanishiga yordam berishga qodir murabbiy topganini, biroq uning Toshkentdan kelib, 12 soat shug‘ullanishi 100 dollar ekanini ma’lum qilgan.
Shundan so‘ng davlat rahbari ushbu bemorning oldiga Sog‘liqni saqlash vazirligidan vakillar kelib, yordam berishiga topshiriq bergan.
Prezidentning ushbu topshirig‘i bo‘yicha Vladislavning xonadoniga 20-mart kuni Toshkent viloyati hokimi Davron Hidoyatov hamda sog‘liqni saqlash vaziri Abduhakim Hojiboyev boshchiligida travmatologiya va nevroxirurgiya bo‘yicha mutaxassis shifokorlar tashrif buyurdi. Ular Vladislavni tekshiruvdan o‘tkazib, holatini o‘rgandi.
Chirchiq shahar tibbiyot birlashmasi vakillari tomonidan o‘tkazilgan suhbat davomida bemor V.A.Denisenko, shuningdek, uning onasi A.Bektasheva bemorning sog‘lig‘ini tiklash uchun 2019-yil koronavirus pandemiyasi boshlanishidan avval xususiy reabilitatsiya shifokori, mashqlar terapiyasi bo‘yicha murabbiy yollashganini ta’kidlagan. Mashg‘ulotlardan so‘ng bemorning ahvolida ijobiy o‘zgarish kuzatilgan, mushak tonusi va bemorning psixologik holati yaxshilangan. Mashg‘ulotlardan so‘ng bemorning to‘liq tiklanishiga ishonch paydo bo‘lgan.
Pandemiya paytida mashg‘ulotlar onlayn rejimiga o‘tkazilgan.
Tegishli reabilitatsiya mutaxassisi Vladislav bilan kunora mashg‘ulotlar olib borgan. Ularning bir sikli 12 mashg‘ulotdan iborat bo‘lgan. 1 siklning narxi 100 AQSh dollarini tashkil qilgan. Otasining vafoti va oilaning og‘ir moddiy ahvoli sabab hozirda bemorni davolash to‘xtab qolish xavfi ostida.
Vladislav va uning onasi davolanish kursini davom ettirish istagini inobatga olgan holda, bemorni reabilitatsiya qilish uchun unga qo‘shimcha maqsadli moddiy yordam kerakligi ta’kidlandi.
Mutaxassislar tomonidan yuqoridagilarni hisobga olgan holda va bemorni to‘liq reabilitatsiya qilish uchun quyidagilar tavsiya etildi:
- uy sharoitida reabilitatsiya mashg‘ulotlarini davom ettirish;
- uyning kirish qismida pandus qurishni tashkil etish.
Vladislav ahvolidan xabar olingach, “Daryo” muxbiri shifokorlardan biri – Respublika ixtisoslashtirilgan travmatologiya va ortopediya ilmiy amaliy tibbiyot markazi direktori Murod Irismetov bilan suhbatlashdi.
– Mana, Vladislav ahvoli bilan tanishib oldingiz, aytingchi, uning tuzalib ketishiga umid bormi?
– Avvalambor shuni aytish kerakki, bu yigitimizning o‘zi — sportchi. Biz tekshirib ko‘rganimizdan keyin muskullarining sezuvchanligi bel qismigacha tushgani aniqlandi. Yigit o‘zini tashlab qo‘ymagan. Bu bola bilan gaplashganda bildimki, bu bolaning irodasi kuchli, unda judayam kuchli ishonch bor.
Jarohat to‘g‘risida gapiradigan bo‘lsak, bu juda og‘ir jarohat. Yoshlarimiz suv havzalarida cho‘milayotganda judayam ehtiyot bo‘lishi kerak. O‘ziga juda qattiq ishonib yuborish kerakmas. Ana shu bosh bilan sho‘ng‘igan vaqtda jarohat olgan.
Shu kungacha qilingan muolajalar yaxshi yordam bergan. Men o‘ylaymanki, jarohat og‘irligini hisobga oladigan bo‘lsak, bu bolaga faqat vaqt kerak bo‘ladi. Lekin bu bola orqa miyaning zararlanishi va umurtqa sinishi bilan bog‘liq jarohatdan so‘ng o‘zini tashlab qo‘ymagan.
Bugun bizning, mana kecha davlatimiz rahbarining tashriflaridan so‘ng yigitning ishonchi va irodasi kuchaydi. Biz Vladislavni tashlab qo‘ymaymiz. Har doim xabardor bo‘lib turamiz.
Boya o‘ziga ham tushuntirdim, agar biz sog‘lom odamni 1 hafta qimirlatmasdan yotqizib qo‘ysak, uning 85 foiz mushaklarining tonusi ketib qoladi. Agar bu jarayon yillar davomida davom etsa,bu muskullar lattaga aylanib qoladi. Lekin bu yigitimizda bu narsa yo‘q. Qo‘l muskullarining tonusi yaxshi saqlangan.
Men o‘ylaymanki, bizning ko‘rigimiz va tavsiyalarimiz Vladislavga kuch bag‘ishlaydi.
– Davolash bo‘yicha qanday rejalar qilingan?
– Vladislavda amaliyotlar bajarilgan, mana bizning Nevroxirurgiya markazimiz tomonidan juda ham buyuk ishlar qilingan. Ya’ni, kelgan vaqtda to‘g‘ri muolajalar o‘tkazilib, bemorni to‘g‘ri yo‘nalishda davolashgan. Men o‘ylaymanki, shularning natijasida yigit hozirgi holatga keldi. Bundan keyin, mana biz hozir konsilium qildik. Bemorga hozircha operativ davo muolajalariga ko‘rsatma yo‘q. Hozir faqat vaqt kerak va shu vaqt davomida bizlar reabilitatsiya o‘tishimiz kerak. Reabilitatsiya — bu bemorning ruhiy va jismoniy holatini hayotga qaytarish, — deydi Murod Irismetov.
Shuningdek, bemor haqida Respublika ixtisoslashtirilgan travmatologiya va ortopediya ilmiy amaliy tibbiyot markazi shifokori G‘ayrat Kariyev ham o‘z fikrini bildirib o‘tdi.
– Bemorning jarohat olganiga uch yil bo‘lgan. Bizning markazga olib kelinganida juda og‘ir ahvolda edi. Orqa miyasi va umurtqasi jiddiy jarohat olgandi. Uning boshi va bo‘ynidan boshqa yeri harakatlanmasdi.
Davolanishning 5-kuni yelka sohasi va qo‘llari harakatlana boshlagan. Shundan uch yil o‘tdi. Bu vaqt davomida bolaning otasi uni mamlakatimizda va Rossiyada davolatgan. Shuningdek, bolaning otasi uning uyida sportzal tashkil qilib bergan. Unda yigit doim shug‘ullangan.
Davo topishga umid bor, yigit mashg‘ulotlarni to‘xtatmasligi kerak. Uning ko‘zlarida ishonch bor, unda optimizm bor. Lekin nimadir deyishga baribir erta. Vaqt kerak, muolaja kerak.
Izoh (0)