Oliy Majlis Senatining Mudofaa va xavfsizlik masalalari qo‘mitasi raisi Qutbiddin Burhonov Uzbekistan Airways AJ boshqaruvi raisi vazifasini bajaruvchi Ilhom Mahkamovga senator so‘rovini yubordi.
Ta’kidlanishicha, unda aviachiptalar sotuvi borasida mamlakat aholisini ortiqcha va sun’iy to‘siqlardan, sansalorlikdan xalos qilish, shuningdek, aviachiptalar savdosidagi korrupsiyaviy holatlarning oldini olish masalasi ko‘tarilgan.
“Aviakompaniyaga qarashli aviakassalar faoliyatida, ayniqsa, aviachipta sotishda eskirgan byurokratik usullar hamon saqlanib qolayotgani ko‘rinmoqda.
Xususan, aviakompaniyaning 2015-yil 25-oktabrdagi 75-son buyrug‘i bilan tasdiqlangan Yo‘riqnomaning 3.1 bandiga muvofiq, agar fuqarolarimiz aviakompaniya kassalaridan yaqinlari uchun aviachipta sotib olmoqchi bo‘lsa, ulardan fuqarolik pasportining asl nusxasi talab qilinmoqda. Aks holda fuqarolarga aviachipta sotilmayapti. Oqibatda bu holat, ayniqsa, yaqinlari boshqa viloyatlarda yashayotganlar uchun qator qiyinchiliklarni yuzaga keltirmoqda va yo‘lovchilarning haqli e’tirozlari kundan kunga ko‘paymoqda”, — deydi senator.
Biroq kompaniya sayti orqali onlayn tarzda fuqarolik pasportining seriya raqami va amal qilish muddatlarini ko‘rsatgan holda aviachiptani qonuniy asoslarda sotib olish imkoniyati mavjud.
Senator so‘rovida yuqoridagilarni inobatga olib, aviakompaniyaning 75-son buyrug‘i bilan tasdiqlangan Yo‘riqnomaga aviachiptalar sotib olish bo‘yicha belgilangan talablarni soddalashtirishga qaratilgan tegishli o‘zgartishlar kiritish choralarini ko‘rish va natijasi yuzasidan ma’lumotlar taqdim etish so‘ralgan.
Avvalroq Uzbekistan Airways Moskvadan Samarqandga repatriatsiya qatnovlarini amalga oshirishi, Toshkentdan Olmaotaga parvozlar 28-martdan boshlanishi, 29-martdan boshlab Samarqanddan Istanbulga muntazam aviaqatnovlar yo‘lga qo‘yilishi to‘g‘risida xabar berilgandi.
Izoh (0)