Navoiy viloyatining Navbahor tumanida yashovchi fuqaro mast holda uyiga kelgan mehmonni pichoqlab o‘ldirdi. Bu haqda “Daryo”ga viloyat IIB axborot xizmati rahbari O‘ktam Usmonov xabar berdi.
Ta’kidlanishicha, 2021-yil 17-mart kuni Navbahor tumanidagi “Qalqonota” mahalla fuqarolar yig‘inida yashovchi 40 yoshli fuqaro B.P. “Toshrabot” mahallasida yashovchi 52 yoshli tanishi V.Ch.ning xonadoniga mehmonga borgan. Ular birgalikda spirtli ichimlik iste’mol qilgan. Oradan bir necha soat vaqt o‘tib, ikki fuqaro o‘rtasida kelishmovchilik kelib chiqqan va janjalga aylangan.
Spirtli ichimlik ta’sirida bo‘lgan mehmon mezbonning yuziga urgan. Mastligi tufayli hushi o‘zida bo‘lmagan fuqaro V.Ch. esa oshxona pichog‘i bilan B.P.ning chap ko‘krak qismiga bir marotaba urib, unga og‘ir tan jarohati yetkazgan. Oqibatda pichoqlangan erkak voqea joyida vafot etgan.
O‘ktam Usmonovga ko‘ra, ushbu holat Navbahor tumani “Toshrabot” mahallasida keng jamoatchilik vakillari, viloyat va tuman sektorlari rahbarlari ishtirokida muhokama qilingan. Jinoyatning kelib chiqish sabablari tahlil qilingan. Shuningdek, muhokama davomida mahalladagi kelishmovchiliklarga o‘z vaqtida e’tibor qaratilmayotgani tanqid qilingan.
Ayni paytda Navbahor tuman prokuraturasi tomonidan gumonlanuvchi V.Ch.ga nisbatan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, dastlabki tergov harakatlari olib borilmoqda.
Mavzuga doir:
- Jizzaxda mast holatda sherigini o‘ldirib, uning murdasini yoqib yuborgan ikki erkak qo‘lga olindi
- Qoraqalpog‘istonda yigit boshqaga erga tegib ketgan sevgan qizini pichoqlab o‘ldirdi. Qiz o‘limidan oldin yigitni aybsiz deb ko‘rsatma berdi
- Samarqandda er arazlab ketib qolgan xotinini 31 marta pichoq urib o‘ldirdi
Izoh (0)