Олий Мажлис Сенатининг Мудофаа ва хавфсизлик масалалари қўмитаси раиси Қутбиддин Бурҳонов Uzbekistan Airways АЖ бошқаруви раиси вазифасини бажарувчи Илҳом Маҳкамовга сенатор сўровини юборди.
Таъкидланишича, унда авиачипталар сотуви борасида мамлакат аҳолисини ортиқча ва сунъий тўсиқлардан, сансалорликдан халос қилиш, шунингдек, авиачипталар савдосидаги коррупциявий ҳолатларнинг олдини олиш масаласи кўтарилган.
«Авиакомпанияга қарашли авиакассалар фаолиятида, айниқса, авиачипта сотишда эскирган бюрократик усуллар ҳамон сақланиб қолаётгани кўринмоқда.
Хусусан, авиакомпаниянинг 2015 йил 25 октябрдаги 75-сон буйруғи билан тасдиқланган Йўриқноманинг 3.1 бандига мувофиқ, агар фуқароларимиз авиакомпания кассаларидан яқинлари учун авиачипта сотиб олмоқчи бўлса, улардан фуқаролик паспортининг асл нусхаси талаб қилинмоқда. Акс ҳолда фуқароларга авиачипта сотилмаяпти. Оқибатда бу ҳолат, айниқса, яқинлари бошқа вилоятларда яшаётганлар учун қатор қийинчиликларни юзага келтирмоқда ва йўловчиларнинг ҳақли эътирозлари кундан кунга кўпаймоқда», — дейди сенатор.
Бироқ компания сайти орқали онлайн тарзда фуқаролик паспортининг серия рақами ва амал қилиш муддатларини кўрсатган ҳолда авиачиптани қонуний асосларда сотиб олиш имконияти мавжуд.
Сенатор сўровида юқоридагиларни инобатга олиб, авиакомпаниянинг 75-сон буйруғи билан тасдиқланган Йўриқномага авиачипталар сотиб олиш бўйича белгиланган талабларни соддалаштиришга қаратилган тегишли ўзгартишлар киритиш чораларини кўриш ва натижаси юзасидан маълумотлар тақдим этиш сўралган.
Аввалроқ Uzbekistan Airways Москвадан Самарқандга репатриация қатновларини амалга ошириши, Тошкентдан Олмаотага парвозлар 28 мартдан бошланиши, 29 мартдан бошлаб Самарқанддан Истанбулга мунтазам авиақатновлар йўлга қўйилиши тўғрисида хабар берилганди.
Изоҳ (0)