Shimoliy Koreya Malayziya bilan diplomatik aloqalarni uzayotganini ma’lum qildi. Bunga sabab qilib Malayziyaning o‘z hududidagi Shimoliy Koreya fuqarosini AQShga topshirmoqchiligi ko‘rsatilmoqda, deb yozadi “RBK”.
Malayziyada yashovchi shimoliy koreyalik ishbilarmon BMTning sanksiyalarini buzgan holda Singapurdan Pxenyanga taqiqlangan qimmatbaho mollarni yetkazib berishda ayblanmoqda. Malayziya Oliy sudi uni AQShga ekstraditsiya qilish kerak, degan xulosaga keldi va ekstraditsiyaga qarshi apellyatsiyani rad etdi.
Koreya Markaziy telegraf agentligi tomonidan keltirilgan KXDR Tashqi ishlar vazirligining bayonotida aytilishicha, bu hodisa “AQShning dushmanlik siyosatidan kelib chiqqan holda Koreyani izolyatsiya qilish va bo‘g‘ib o‘ldirishga qaratilgan, shuningdek, Malayziya hukumatining Amerikaga laganbardorlik siyosati oqibatidagi Koreyaga qarshi fitnaning ochiqdan ochiq ko‘rinishidir”.
“Mavjud og‘ir vaziyatdan kelib chiqib, KXDR Tashqi ishlar vazirligi AQSh bosimi ostida KXDRga qarshi dushmanlik xatti-harakatini amalga oshirgan Malayziya bilan shu tariqa diplomatik aloqalarning to‘liq uzilishini e’lon qiladi”.
Pxenyanning ta’kidlashicha, tadbirkor “qonuniy tashqi savdo faoliyati” bilan shug‘ullangan va Malayziya hukumati ikki davlat o‘rtasida yuzaga keladigan barcha oqibatlarga to‘liq javobgar bo‘ladi. Hisobotda aytilishicha, AQSh “parda ortidagi manipulyator va asosiy aybdor” sifatida “hali qilmishiga javob beradi”.
Reuters xabariga ko‘ra, Malayziya sudi 2019-yil dekabr oyida Federal tergov byurosining (FQB) 54 yoshli Mun Chxve Myunni ekstraditsiya qilish to‘g‘risidagi talabini qondirgan. AQSh Adliya vazirligi uni bank firibgarligida, “pul yuvish”da va xalqaro sanksiyalarni buzishda Pxenyanga yordam berishda ayblagan.
Eslatib o‘tamiz, 16-mart kuni Shimoliy Koreya yetakchisi Kim Chen Inning singlisi Kim Yo Chjon Janubiy Koreya va AQShning qo‘shma harbiy mashg‘ulotlari munosabati bilan KXDRning Vatanni tinch yo‘l bilan birlashtirish bo‘yicha tuzilgan qo‘mitani tugatish masalasini ko‘tarib, Seul bilan tuzilgan tinchlik bitimidan bosh tortishi haqida tahdid qilgan edi. Bundan tashqari, u AQSh prezidenti Jo Bayden ma’muriyatini yaqin to‘rt yil ichida bemalol uxlashimga to‘sqinlik qiladigan hech narsa qilmagani yaxshiroq, deb ogohlantirgan. Bu Shimoliy Koreyaning Bayden ma’muriyatiga prezident inauguratsiyadan keyingi birinchi murojaatidir.
Shuningdek, Shimoliy Koreya AQSh bilan aloqalarni tiklash uchun o‘z shartlarini ma’lum qilgan.
Izoh (0)