Bolgariya poytaxti Sofiyada Rossiya foydasiga josuslik qilganlikda gumonlangan bir necha kishi qo‘lga olindi. Bu haqda BNT Bolgariya milliy telekanaliga asoslanib, “RBK” xabar berdi.
Hibsga olinganlarning aniq soni haqida ma’lumot berilmagan. BNT ma’lumotlariga ko‘ra, gumonlanuvchilar hibsga olingandan so‘ng Sofiyaning janubiy tumanlari va Pernik shahri yaqinidagi bir nechta manzillarda tintuv o‘tkazilgan.
“bTV Novinite” telekanalining manbalariga ko‘ra, tintuv operatsiyasi Bolgariya davlat xavfsizlik xizmati va Ichki ishlar vazirligi xodimlari tomonidan amalga oshirilgan. Ular Sofiyadan “Trakiya” magistrali bo‘ylab Plovdiv shahri tomon ketayotganlarning hujjatlarini tekshirgan. Dastlabki ma’lumotlarga ko‘ra, ushbu yo‘lda gumonlanuvchilardan biri qo‘lga olingan edi.
NOVA telekanali gumonlanuvchilar maxfiy ma’lumotlarga ega Bolgariya amaldorlari guruhi ekanini xabar qildi. Shuningdek, “24 chasa” gazetasi hibsga olinganlarning Rossiya fuqarosi emasligi haqida xabar bergan.
Hukumat josuslikda gumon qilinganlarning hibsga olinganini hali tasdiqlamadi.
Avvalroq Rossiyada maxfiy ma’lumotlarni Xitoyga yetkazgan erkak sakkiz yilga koloniyaga hukm qilingani haqida xabar berilgandi.
Shuningdek, AQShda sobiq harbiy xizmatchi Rossiya foydasiga josuslik qilishda ayblanib hibsga olingan. Ayblanuvchi 45 yoshli Piter Debbins. Hukumat ma’lumotlariga ko‘ra, u 1996-yilning dekabridan 2011-yilning yanvariga qadar Rossiya razvedkasi bilan aloqada bo‘lgan. Adliya vazirligi xabarida qayd etilishicha, 1997-yilda u Rossiya foydasiga ishlashga roziligini tasdiqlovchi hujjatni imzolagan.
Izoh (0)