Andijonda “Agrobank” xodimi 219,5 mln so‘mni talon-toroj qilgani aniqlandi

“Agrobank”ning Andijondagi tuman filiali mas’ul shaxsi soxta ma’lumotlar tayyorlash orqali 219,5 million so‘mni talon-toroj qilgani aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Departamentning Andijon tuman bo‘limi tomonidan AT “Agrobank” Andijon filialining murojaatiga asosan o‘tkazilgan tergovga qadar tekshiruvda ushbu shaxs “G.A.” MChJ rahbari M.O. bilan oldindan til biriktirib, 2019—2020-yillarda 9 nafar fuqaroning xabarisiz ularning nomiga soxta ma’lumotlar tayyorlash orqali 129,5 million so‘m, fuqaro X.M. bilan oldindan til biriktirib, 3 nafar yakka tartibdagi tadbirkor nomiga 90 million so‘m, jami 219,5 million so‘m imtiyozli kredit ajratib, ushbu kredit mablag‘larini shaxsiy ehtiyojlari uchun sarflab, o‘zlashtirish yo‘li bilan talon-toroj qilgani aniqlangan.

Holat yuzasidan Jinoyat kodeksining 167-moddasi (talon-toroj qilish) 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq kreditni talon-toroj qilishda gumonlangan “O‘zsanoatqurilishbank” sobiq mansabdorlari aybsiz deb topilgani, ularga nisbatan qo‘zg‘atilgan jinoyat ishi tugatilgani haqida xabar berilgan edi.