Megan Markl shov-shuvli intervyudan keyin o‘zini siyosatda sinab ko‘rmoqchi. Buni eshitgan Tramp yana prezidentlik uchun kurashishini aytdi

Shahzoda Garrining rafiqasi Megan Marklning Britaniya qirollik oilasini irqchilikda ayblab, Opra Uinfriga bergan intervyusi atrofidagi shov-shuvlar davom etmoqda. Endi Britaniya matbuoti Meganning siyosiy ambitsiyalari haqida gapirishni boshladi. Go‘yoki, Marklning AQSh prezidentlaridan kam joyi yo‘q, deb yozadi “Korrespondent.net”.

Buyuk Britaniya Leyboristlar partiyasining yuqori amaldorlaridan biri va ma’muriyat faxriysi, Vashington bilan mustahkam aloqa o‘rnatgan Toni Bler Daily Mail’ga bergan intervyusida Megan Marklning AQSh prezidentligiga saylovoldi kampaniyasi va mablag‘ yig‘ish guruhlarini tuzish uchun yuqori martabali demokratlar bilan bog‘lanayotganini aytdi.

“Sasseks gersoginyasi bu masalada izoh berishdan bosh tortdi, ammo er-xotin o‘zlarining siyosiy qarashlarini sir tutmaydi. AQShda 2020-yilgi prezidentlik saylovlari chog‘ida juftlik Donald Trampga ko‘rinmas zarba berib, saylovchilarni ‘nafratni qo‘zg‘atuvchi nutqlarni tinglamaslikka’ chaqirgandi, er-xotinning vakili buni ‘odob-axloqqa chorlash’ deb atagan”, — deyiladi Daily Mail xabarida.

“Bler tarafdorlari, internatsionalistlar va Demokratik tarmoqlar orasida Meganning siyosiy ambitsiyalari va potensial tarafdorlari haqida shov-shuv paydo bo‘ldi”, — deb yozadi Daily Mail.

Shu o‘rinda AQShning 45-prezidenti Donald Tramp agar Megan Markl navbatdagi prezidentlik saylovlariga nomzodini qo‘ysa, o‘zining “saylovlarda qatnashishga ko‘proq moyil bo‘lishini” aytdi.

“Umid qilamanki, bu (Megan Marklning saylovdagi ishtiroki) amalga oshadi”, — dedi Tramp Fox News telekanaliga bergan intervyusida. Unga ko‘ra, Sasseks gersoginyasining saylovlarda ishtirok etishi Trampning saylovlarda qatnashish istagini kuchaytiradi.

Biroq Tramp Marklning qirol oilasi va Buyuk Britaniya qirolichasi Yelizaveta II haqidagi bayonotlari tufayli uning “muxlisi”ga aylanmaganini ta’kidladi. “Malika bilan tanishman deyolmayman. Qirolicha bilan ko‘rishganman, u ajoyib ayol, ammo men Meganning muxlisi emasman”, — dedi Tramp.

Uzoq muddatli rejalar

2020-yili Meganning dugonasi Vanity Fair jurnaliga bergan intervyusida Meganning Britaniya qirollik oilasi a’zosi bilan turmush qurgan payt Amerika fuqaroligidan voz kechmaganiga sabablardan biri bu uning Vashington siyosatida ishtirok etish imkoniyatini saqlab qolish ekanini aytgan.

Amerikalik mutaxassislar, agar AQShda davlat lavozimini egallashni istasa, Marklning Sasseks gersoginyasi unvonidan voz kechishi kerakligini ta’kidlaydi.

Taxminlarga ko‘ra, gersoginya 2024-yil 82 yoshga kiradigan prezident Jo Bayden ikkinchi muddatga saylanishni xohlaydimi yoki yo‘qligi haqida o‘ylamoqda.

Hillari va Obamaning izidan

Agar Megan Oq uyga kirsa, u AQShning birinchi ayol prezidenti va Barak Obamadan keyin Oval ofisning ikkinchi oq tanli bo‘lmagan egasi bo‘ladi.

Markl, shuningdek, siyosatga o‘tishdan oldin 40 yil davomida Gollivud aktyori bo‘lgan prezident Ronald Reyganning izidan yurgan bo‘ladi. Meganning do‘stlari ilgari uning siyosiy ambitsiyalari haqidagi mish-mishlarni qo‘llab-quvvatlab, ularni “Amerika orzusini ro‘yobga chiqarish” deb ta’riflagan.