Fransiyaning sobiq prezidenti, ilgari korrupsiyada ayblanib sudlangan Nikolya Sarkozi yana sudga tortiladi, bu safar u 2012-yilgi saylovoldi kampaniyasini noqonuniy moliyalashtirish va firibgarlikda ayblanmoqda. Bu haqda France 24 xabar berdi.
Xabarga ko‘ra, Sarkozining muvaffaqiyatsizlikka uchragan saylovoldi kampaniyasida mitinglar va tarafdorlar bilan uchrashuvlarning haddan ortiq dizayni uchun sarflangan pullar limitdan 24 million dollarga oshib ketgan. Xarajatlarni qoplash uchun uning shtab-kvartirasi xodimlari soxta hisoblar bilan moliyaviy firibgarlikka qo‘l urgan.
Fransiya sobiq rahbarining o‘zi o‘shanda nimalar bo‘layotganidan bexabar bo‘lganini ta’kidlamoqda. Agar aybdor deb topilsa, u bir yilgacha ozodlikdan mahrum qilinishi va 4500 dollar miqdorida jarimaga tortilishi mumkin.
Avvalroq Sarkozi korrupsiya ishi bo‘yicha sud qarori ustidan shikoyat kiritishini ma’lum qilgandi. Uning advokati o‘z mijoziga chiqarilgan sud hukmi asoslanmagani va xolis emasligini ta’kidlagan. U Sarkozining aybsiz ekanligini isbotlashga urinishini va’da qilgan.
Eslatib o‘tamiz, 1-mart kuni Parij sudi Sarkozini korrupsiya va mansabni suiiste’mol qilganlik bilan bog‘liq ishda ayblab, unga bir yillik qamoq jazosi va ikki yillik shartli qamoq jazosini tayinlagan edi. Ushbu ish bo‘yicha yana ikki sudlanuvchi — Sarkozining sobiq advokat Tyerri Erzog va sobiq prokuror Jilber Aziberga ham xuddi shunday jazo tayinlangan. Ular 2014-yildagi “maxfiy eshituvlar” ishi yuzasidan sud qilingan edi.
Tergov ma’lumotlariga ko‘ra, sobiq prezident advokati orqali Aziberga Monakodagi o‘rnini va’da qilgan bo‘lishi mumkin. Buning evaziga Aziber yana bir tergov to‘g‘risida maxfiy ma’lumotlarni taqdim etishi kerak edi: Sarkozining 2007-yildagi saylovoldi kampaniyasi L’Oreal fransuz kompaniyasining merosxo‘ri Lilian Betankur tomonidan noqonuniy ravishda moliyalashtirilgani haqidagi ayblovlar bilan bog‘liq ma’lumotlar.
Tergovning ma’lumotlariga ko‘ra, 2007-yilda Betankur bilan uchrashuv paytida Sarkozi undan 150 ming yevro naqd pul olgan. Aytishlaricha, u ushbu mablag‘ni o‘zining saylovoldi kampaniyasini moliyalashtirishga sarflagan. Fransiya qonunlariga ko‘ra, nomzodlarga 4,6 ming yevrodan ortiq miqdordagi xayriya mablag‘larini qabul qilish taqiqlanadi.
Avvalroq Janubiy Koreya rahbari davlat tashkiloti xodimlari bilan bog‘liq korrupsiya mojarosi uchun uzr so‘ragani, Qirg‘iziston Oliy sudining raisi korrupsiyada ayblanayotgani hamda Braziliyaning sobiq prezidentiga qo‘yilgan korrupsiya ayblovlari bekor qilingani haqida xabar berilgandi.
Izoh (0)