Toshkent viloyatida karantin qoidalariga amal qilish nazorati kuchaytiriladi. Bu haqda viloyat hokimligi matbuot xizmati xabar berdi.
Ma’lum qilinishicha, bu boradagi qaror Toshkent viloyati hududida kasallik tarqalishining oldini olish, fuqarolar salomatligini muhofaza qilish va xavfsizligini ta’minlash maqsadida viloyat mas’ullari ishtirokida o‘tkazilgan kengaytirilgan yig‘ilishda qabul qilingan.
Unga ko‘ra, asosan aholi gavjum bo‘ladigan bozor va savdo markazlari, jamoat joylari va jamoat transportlarida ijtimoiy masofani saqlash, himoya niqobini taqish va antiseptik vositalardan foydalanish holatlari yuzasidan viloyat hududida nazorat tadbirlari o‘tkazilishi belgilangan.
Avvalroq Toshkent shahridagi taksi va qurilish sohasida karantin choralari kuchaytirilishi, poytaxt hokimligi va uning tizimidagi barcha tuzilmalarda turli yig‘ilishlarni o‘tkazish taqiqlangani haqida xabar berilgan edi. Koronavirus keng tarqalishining oldini olish maqsadida Toshkentdagi ayrim maktablarda o‘qish bosqichma-bosqich masofaviy shaklga o‘tkazilmoqda, bozor va savdo markazlarida karantin talablari kuchaytirildi.
Izoh (0)