O‘zbekiston Kanadaning SkyPower Global kompaniyasiga yetkazib beriladigan elektr energiyasini sotib olish bo‘yicha kafolatni taqdim etdi. Bu haqda energetika vaziri Sherzod Xo‘jayevga tayanib, “Gazeta.uz” xabar berdi.
2020-yilning martida Kanadaning SkyPower Global asoschisi va ijrochi direktori Kerri Adler O‘zbekistonda quyosh energetikasi bo‘yicha 1,3 milliard dollarlik loyihani amalga oshirishdagi qiyinchiliklar haqida gapirgan edi.
Tadbirkor, xususan, shartnoma imzolanganiga ikki yil bo‘lganiga qaramasdan, mamlakat hukumati energiyani sotib olish haqida kafolat taqdim etmaganini bildirgan. O‘zbekiston Prezidentining 2018-yil aprelidagi qarori bilan “O‘zbekenergo” yetkazib berilgan elektr energiyasi uchun to‘lovlarni amalga oshira olmagan taqdirda, qarzdorlik Moliya vazirligi kafolati ostida davlat budjetidan qoplanishi belgilangan.
Kerri Adler intervyuda Prezident Mirziyoyev Moliya vazirligiga 2018-yilda topshiriq berganiga qaramasdan, vazirlik haligacha kompaniyaga to‘lov kafolati bermaganini ma’lum qilgandi. Shartnomaga ko‘ra, SkyPower Global ishlab chiqargan tokning kilovatti uchun “O‘zbekenergo” 6 sent to‘lashi kerak. Solishtirish uchun: oktabrda BAAning Masdar kompaniyasi Navoiyda fotoelektr stansiyasi qurilishi uchun tenderda 1 kVt quyosh energiyasi uchun 2,679 sent taklif qilgan holda g‘olib chiqqan (tenderda eng qimmat taklif Total Eren tomonidan ilgari surilgan — 4,273 sent). Kompaniya yanada jozibador takliflar paydo bo‘lganiga qaramay, O‘zbekistondan o‘z majburiyatini bajarishni so‘ragan.
Energetika vazirining o‘rinbosari Sherzod Xo‘jayev O‘zbekiston hukumati va SkyPower Global o‘rtasidagi sud mojarolari to‘g‘risidagi mish-mishlarni rad etgan.
“SkyPower kompaniyasi bilan sudgacha yetib bormadik. SkyPower bilan shartnomaning shartlariga ko‘ra, ular tomonidan ayrim talablar bajarilmagan, shunga qaramay, ular bizga e’tiroz bildirmoqda: Shartnomani 100 foiz bajarib, keyin talab qiling. Biz rozi bo‘ldik va bugungi kunda shartnomadagi majburiyatimizni 100 foizga bajardik. Ularga ‘Biz bajardik, endi sizlarning navbatingiz’ dedik. Agarda ular bajarmasa, huquqiy ziddiyat, shartnoma shartlarining bajarilmaganiga olib keladi”, — deydi vazir o‘rinbosari.
Kerri Adlerning ta’kidlashicha, kompaniya 10 million dollar sarflab yuborgan, loyiha uchun yer topgan, ofis ochgan, odamlarni yollagan, Dubaydagi ofisini kengaytirgan, global tender o‘tkazgan, qurilishni boshlash bo‘yicha ishlarni amalga oshirgan — tayyor loyihalar va sheriklar bor.
Vazir o‘rinbosarining qayd etishicha, shartnoma shartlariga ko‘ra, kompaniya o‘z xarajatlarining qoplanishini talab etishga haqli emas.
“Ular davlat ishlab chiqarilgan energiyani sotib olishi bo‘yicha kafolat berilishini so‘radi. Ularga rasman kafolat xatini berdik. Marhamat, keling va elektr energiyasini ishlab chiqaring, biz uni sotib olamiz”, — deydi u.
Sherzod Xo‘jayevning ma’lum qilishicha, O‘zbekiston hukumati shartnomani imzolash vaqtida 1 kilovatt/soat elektr energiyasini 6 sentdan sotib olishga rozi bo‘lgan.
“Mamlakatning obro‘si degan tushunchalar bor. Har doim ham foyda bilan ishlayvermaysiz, ba’zida zarariga ham ishlash kerak, biroq obro‘ bor. Biz o‘z kafolatimizni berdik. Endi ular elektr energiyasi ishlab chiqara oladimi, yo‘qmi ko‘ramiz”, — deydi vazir o‘rinbosari.
Izoh (0)