Ўзбекистон Канаданинг SkyPower Global компаниясига етказиб бериладиган электр энергиясини сотиб олиш бўйича кафолатни тақдим этди. Бу ҳақда энергетика вазири Шерзод Хўжаевга таяниб, «Gazeta.uz» хабар берди.
2020 йилнинг мартида Канаданинг SkyPower Global асосчиси ва ижрочи директори Керри Адлер Ўзбекистонда қуёш энергетикаси бўйича 1,3 миллиард долларлик лойиҳани амалга оширишдаги қийинчиликлар ҳақида гапирган эди.
Тадбиркор, хусусан, шартнома имзоланганига икки йил бўлганига қарамасдан, мамлакат ҳукумати энергияни сотиб олиш ҳақида кафолат тақдим этмаганини билдирган. Ўзбекистон Президентининг 2018 йил апрелидаги қарори билан «Ўзбекэнерго» етказиб берилган электр энергияси учун тўловларни амалга ошира олмаган тақдирда, қарздорлик Молия вазирлиги кафолати остида давлат бюджетидан қопланиши белгиланган.
Керри Адлер интервьюда Президент Мирзиёев Молия вазирлигига 2018 йилда топшириқ берганига қарамасдан, вазирлик ҳалигача компанияга тўлов кафолати бермаганини маълум қилганди. Шартномага кўра, SkyPower Global ишлаб чиқарган токнинг киловатти учун «Ўзбекэнерго» 6 сент тўлаши керак. Солиштириш учун: октябрда БААнинг Masdar компанияси Навоийда фотоэлектр станцияси қурилиши учун тендерда 1 кВт қуёш энергияси учун 2,679 сент таклиф қилган ҳолда ғолиб чиққан (тендерда энг қиммат таклиф Total Eren томонидан илгари сурилган — 4,273 сент). Компания янада жозибадор таклифлар пайдо бўлганига қарамай, Ўзбекистондан ўз мажбуриятини бажаришни сўраган.
Энергетика вазирининг ўринбосари Шерзод Хўжаев Ўзбекистон ҳукумати ва SkyPower Global ўртасидаги суд можаролари тўғрисидаги миш-мишларни рад этган.
«SkyPower компанияси билан судгача етиб бормадик. SkyPower билан шартноманинг шартларига кўра, улар томонидан айрим талаблар бажарилмаган, шунга қарамай, улар бизга эътироз билдирмоқда: Шартномани 100 фоиз бажариб, кейин талаб қилинг. Биз рози бўлдик ва бугунги кунда шартномадаги мажбуриятимизни 100 фоизга бажардик. Уларга ‘Биз бажардик, энди сизларнинг навбатингиз’ дедик. Агарда улар бажармаса, ҳуқуқий зиддият, шартнома шартларининг бажарилмаганига олиб келади», — дейди вазир ўринбосари.
Керри Адлернинг таъкидлашича, компания 10 миллион доллар сарфлаб юборган, лойиҳа учун ер топган, офис очган, одамларни ёллаган, Дубайдаги офисини кенгайтирган, глобал тендер ўтказган, қурилишни бошлаш бўйича ишларни амалга оширган — тайёр лойиҳалар ва шериклар бор.
Вазир ўринбосарининг қайд этишича, шартнома шартларига кўра, компания ўз харажатларининг қопланишини талаб этишга ҳақли эмас.
«Улар давлат ишлаб чиқарилган энергияни сотиб олиши бўйича кафолат берилишини сўради. Уларга расман кафолат хатини бердик. Марҳамат, келинг ва электр энергиясини ишлаб чиқаринг, биз уни сотиб оламиз», — дейди у.
Шерзод Хўжаевнинг маълум қилишича, Ўзбекистон ҳукумати шартномани имзолаш вақтида 1 киловатт/соат электр энергиясини 6 сентдан сотиб олишга рози бўлган.
«Мамлакатнинг обрўси деган тушунчалар бор. Ҳар доим ҳам фойда билан ишлайвермайсиз, баъзида зарарига ҳам ишлаш керак, бироқ обрў бор. Биз ўз кафолатимизни бердик. Энди улар электр энергияси ишлаб чиқара оладими, йўқми кўрамиз», — дейди вазир ўринбосари.
Изоҳ (0)