Argentina politsiyasi mamlakat prezidenti Alberto Fernandes o‘tirgan avtomobilga hujumda gumon qilib, besh kishini qo‘lga oldi. Bu haqda mahalliy Todo Noticias telekanaliga tayanib, “RBK” xabar berdi.
Politsiya xodimlari tergov harakatlari, shu jumladan, bir necha marta tintuvlar o‘tkazdi. Telekanal xabariga ko‘ra, politsiyachilar prezident avtomobiliga hujum uyushtirgan sakkiz nafar jinoyatchining shaxsini aniqladi va ularning besh nafarini qo‘lga oldi.
Prezident Fernandes o‘tirgan mikroavtobusga 13-mart kuni davlat rahbari Chubut provinsiyasidagi yong‘indan zarar ko‘rgan hududlarga tashrifi chog‘ida hujum uyushtirilgan. Rasmiy delegatsiya Lago-Puelo shaharchasi bo‘ylab mikroavtobusda harakatlanayotgan edi. Transport provinsiya gubernatori Mariano Archoni tomonidan targ‘ib qilinayotgan kon loyihasining amalga oshirilishiga qarshi norozilik bildirgani chiqqan namoyishchilar bilan o‘rab olindi. Keyin ular transportni toshbo‘ron qila boshladi va uning oynalaridan birini sindirdi. Voqea natijasida hech kim jabrlanmadi.
Izoh (0)