Тошкент вилоятида ўтказилаётган «зарбдор ойлиги» доирасида тезкор ходимлар тахминий нархи 1 миллиард сўмлик гиёҳвандлик ва психотроп дори воситаларининг ноқонуний айланмасига чек қўйди, деб хабар бермоқда вилоят ИИБ матбуот хизмати.
3 март куни Тошкент тумани ИИБ Жиноят қидирув бошқармаси тезкор ходимлари томонидан ўтказилган тадбир давомида 1984 йилда туғилган М.К. ва шериги 1988 йилда туғилган Л.А. назоратдаги аризачига 15 та конвалютадаги жами 150 дона «Трамадол» таблеткасини 300 минг сўмга сотаётган вақтида ушланган.
Улар дориларни М. исмли шахсдан олганлигини айтган ва тадбир давом эттирилиб, М.З. ҳам 43 та конвалютадаги жами 430 дона «Трамадол» ва 33 дона «Тропикомид» таблеткасини шартли харидорга сотаётганида қўлга олинган.
Мазкур дори воситасининг асосий манбасини аниқлаш ва жиноятга бутунлай чек қўйиш мақсадида тезкор тадбир давом эттирилиб, олинган маълумотга асосан, Тошкент туманида яшовчи 1984 йилда туғилган А.Ж.нинг хонадони белгиланган тартибда холислар иштирокида кўздан кечирилган. Теркширув давомида А.Ж. 5789 дона «Трамадол» ва 8640 дона «Селофен» кучли таъсир қилувчи психотроп дори воситаси сақлаётганлиги аниқланиб, далилий ашё сифатида ҳужжатлаштирилиб олинган.
Таъкидланишича, Тошкент тумани ИИБ тезкор ходимлар томонидан ўтказилган тадбир натижасида тахминий бозор нархи 1 миллиард сўмга тенг бўлган жами 6239 дона «Трамадол» гиёҳвандлик дори воситаси ва 8640 дона «Селофен» ҳамда 33 дона «Тропикомид» кучли таъсир қилувчи психотроп дори воситаси далилий ашё сифатида олиниб, беш нафар шахс ушланган.
Ҳозирда мазкур ҳолат юзасидан Тошкент тумани ИИБ ҳузуридаги тергов бўлими томонидан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) билан жиноят иши қўзғатилиб, юқорида қайд этилган шахслар процессуал тартибда ушланган.
Изоҳ (0)