Beeline Uzbekistan bosh direktorligi lavozimiga tayinlangan Artashes Davtyan Toshkentga yetib kelmasidan turib, mazkur lavozimdan voz kechdi, deb xabar beradi Uzzoom nashri.
Avvalroq 9-mart kuni VEON kompaniyasi Artashes Davtyan 2021-yil 15-martdan Beeline Uzbekistan bosh direktorligi lavozimiga tayinlanganini e’lon qilgandi. Davtyan Beeline Uzbekistan’ga FMCG, Gillette, PepsiCo va Mars kabi xalqaro kompaniyalardagi rahbarlik tajribalari bilan qo‘shildi. Beeline’ga qadar u o‘zining “Yandeks.Lavka” savdo markasini boshqarib kelgan.
“Rahbarlik lavozimidan voz kechilishiga Unitel MChJga nisbatan tergov ishlari o‘tkazilayotgani to‘g‘risida ma’lumotlar sabab bo‘lgan yoki bo‘lmagani — noma’lum, biroq nima bo‘lganda ham mazkur tayinlov Beeline tarixidagi eng qisqa karyeraga aylanmoqda”, — deyiladi xabarda.
VEON hozirda o‘zining saytidan Davtyanning tayinloviga oid press-relizni o‘chirib tashlagan.
Eslatib o‘tamiz, 2020-yilning oktabrida Beeline Uzbekistan bosh direktori Sergey Afonin egallab turgan lavozimidan ketishga va o‘z karyera yo‘lini VEON kompaniyasi guruhidan tashqarida davom ettirishga qaror qilgani to‘g‘risida xabar berilgandi. VEON Group Sergey Afoninni 2019-yil 1-martdan Beeline Uzbekistan bosh direktori lavozimiga tayinlagan edi. Bunga qadar u Beeline Russia Janubiy mintaqaviy filiali direktori, Rossiyadagi yirik FMCG-kompaniya tijoriy direktori lavozimlarida ishlagan.
Izoh (0)