12 март куни Тошкент шаҳрида Ўзбекистон Олий Мажлис Сенатининг ўн учинчи ялпи мажлиси ўз ишини бошлагани тўғрисида хабар берилганди. «Халқ сўзи Online»нинг ёзишича, мажлисда ички ишлар вазири Пўлат Бобожоновнинг ҳуқуқбузарликларнинг олдини олиш ва уларнинг профилактикаси ҳолати тўғрисидаги 2020 йил якуни бўйича ахбороти эшитилган.
Ички ишлар вазири ўз ахборотида илгари жиноятчилик кўлами фақат рақамлар орқали баҳолангани, ҳозирда бу тизим анча ўзгаргани ҳақида тўхталиб ўтган.
«Жиноятчиликка қарши курашда рақам ортидан қувиш эмас, жиноятчиликнинг асл сабабларини бартараф этиш орқали фуқароларнинг ҳақ-ҳуқуқларини ҳимоя қилишга асосий эътибор қаратилди. Илгари жиноятчилик кўламига рақамларга асосан ‘кўпайди-камайди’ дея баҳо берар эдик, бунинг ортида инсон тақдири ётганини унутиб қўярдик.
Энг ачинарлиси кўрсаткичларни сунъий равишда яхшилаш учун жиноятни ҳисобдан яширишга уринадиган ҳолатлар бор эди. Ёки жиноят сонини оширмаслик учун одам савдоси, фоҳишабозлик, гиёҳвандлик, коррупция билан боғлиқ жиноятларни аниқлашда ташаббус кўрсатилмас эди. Эндиликда бу салбий иллатдан воз кечилди ва вазият ҳудуддаги ҳақиқий аҳволга қараб баҳоланмоқда», — дейди Пўлат Бобожонов.
Эслатиб ўтамиз, 2020 йилнинг августида ички ишлар вазири Пўлат Бобожонов Ўзбекистондаги жазони ижро этиш тизимидаги маҳкумлар сонини маълум қилганди.
Изоҳ (0)