Buxoro viloyatida IIB xodimiga pora taklif qilgan shaxs qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ma’lum bo‘lishicha, viloyatning Kogon shahrida yashovchi 35 yoshli fuqaro M.X. shahar IIB Probatsiya bo‘linmasi hisobida turgan bo‘lishiga qaramasdan sud tomonidan belgilab berilgan cheklovlarni muntazam ravishda buzib kelgan.
Mazkur holat doimiy ravishda davom etayotganini hisobga olgan Kogon shahar IIB huquqbuzarliklar profilaktikasi bo‘limi, ichki ishlar organlari tayanch punkti profilaktika inspektori F.B. holat bo‘yicha hujjatlar rasmiylashtirgan va sudga taqdim qilmoqchiligini ma’lum qilgan. Shunda M.X. to‘plangan hujjatlarni sudga taqdim qilmaslik evaziga IIB xodimiga 200 ming so‘m pora taklif qilgan. IIB xodimi fuqaroga pora berish jinoyat ekanligini qayta-qayta tushuntirsa ham pora taklif qilish davom etgan. Shundan so‘ng, profilaktika inspektori viloyat IIB boshlig‘iga murojaat qilib, bu haqda bildirgi yozgan.
O‘zbekiston Respublikasi IIV O‘XB viloyat bo‘limi, Kogon shahar prokuraturasi va departamentning shahar bo‘limi xodimlari hamkorligida o‘tkazilgan tezkor tadbir jarayonida fuqaro M.X. profilaktika inspektoriga pora berayotgan vaqtda ushlangan hamda holat tegishli tartibda hujjatlashtirilgan.
Mazkur holat yuzasidan fuqaro M.X.ga nisbatan Jinoyat kodeksining 211-moddasi 1-qismi bilan (pora berish) jinoyat ishi qo‘zg‘atilgan. Dastlabki tergov harakatlari olib borilmoqda.
Izoh (0)