Бухоро вилоятида ИИБ ходимига пора таклиф қилган шахс қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Маълум бўлишича, вилоятнинг Когон шаҳрида яшовчи 35 ёшли фуқаро М.Х. шаҳар ИИБ Пробация бўлинмаси ҳисобида турган бўлишига қарамасдан суд томонидан белгилаб берилган чекловларни мунтазам равишда бузиб келган.
Мазкур ҳолат доимий равишда давом этаётганини ҳисобга олган Когон шаҳар ИИБ ҳуқуқбузарликлар профилактикаси бўлими, ички ишлар органлари таянч пункти профилактика инспектори Ф.Б. ҳолат бўйича ҳужжатлар расмийлаштирган ва судга тақдим қилмоқчилигини маълум қилган. Шунда М.Х. тўпланган ҳужжатларни судга тақдим қилмаслик эвазига ИИБ ходимига 200 минг сўм пора таклиф қилган. ИИБ ходими фуқарога пора бериш жиноят эканлигини қайта-қайта тушунтирса ҳам пора таклиф қилиш давом этган. Шундан сўнг, профилактика инспектори вилоят ИИБ бошлиғига мурожаат қилиб, бу ҳақда билдирги ёзган.
Ўзбекистон Республикаси ИИВ ЎХБ вилоят бўлими, Когон шаҳар прокуратураси ва департаментнинг шаҳар бўлими ходимлари ҳамкорлигида ўтказилган тезкор тадбир жараёнида фуқаро М.Х. профилактика инспекторига пора бераётган вақтда ушланган ҳамда ҳолат тегишли тартибда ҳужжатлаштирилган.
Мазкур ҳолат юзасидан фуқаро М.Х.га нисбатан Жиноят кодексининг 211-моддаси 1-қисми билан (пора бериш) жиноят иши қўзғатилган. Дастлабки тергов ҳаракатлари олиб борилмоқда.
Изоҳ (0)