Hukumatning 11-martdagi “Yoshlarni ijtimoiy qo‘llab-quvvatlash bo‘yicha qo‘shimcha chora-tadbirlar to‘g‘risida”gi qarori qabul qilindi. Bu haqda Adliya vazirligi xabar berdi.
Qaror bilan “Yoshlar daftari”ga kiritilgan yoshlarni qo‘llab-quvvatlash jamg‘armasi to‘g‘risidagi namunaviy nizom tasdiqlandi.
Nizomga ko‘ra, “Yoshlar daftari” jamg‘armasi mablag‘lari, jumladan, quyidagilarga yo‘naltiriladi:
- “Yoshlar daftari”ga kiritilgan moddiy ahvoli qiyin yoshlarga BHMning 4 baravarigacha (980 ming so‘m) miqdorda bir martalik moddiy yordam ko‘rsatishga;
- yoshlarni tadbirkorlik va kasb-hunarga o‘qitish bo‘yicha nodavlat ta’lim tashkilotlariga sarflanadigan xarajatlarning 75 foizigacha qismini qoplashga;
- “Yoshlar daftari”ga kiritilgan yoshlarga tadbirkorlik faoliyati hamda o‘zini o‘zi band qilish maqsadida noturar joyning 12 oygacha ijara xarajatlarini ko‘pi bilan bir yilda BHMning 25 baravarigacha (6 million 125 ming so‘m) miqdorda qoplashga;
- “Yoshlar daftari”ga kiritilgan yoshlarga tadbirkorlik faoliyatini boshlash va o‘zini o‘zi band qilishga zarur bo‘lgan asbob-uskunalar va mehnat qurollarini xarid qilish uchun BHMning 40 baravarigacha (9 million 800 ming so‘m) miqdorda subsidiya ajratishga;
- mamlakatdagi OTMda o‘qiyotgan “Temir daftar”ga kiritilgan oilalar farzandlari to‘lov-kontrakt summasining 50 foizigacha, ammo BHMning 50 baravaridan (12 million 250 ming so‘m) oshmagan miqdorda to‘lab berishga;
- “Temir daftar”ga kiritilgan oilalarning ahvoli og‘ir bo‘lgan bemor farzandlariga mamlakatda yoki xorijiy davlatda davolanish bilan bog‘liq xarajatlarni BHMning 50 baravaridan (12 million 250 ming so‘m) oshmagan miqdorda qoplashga.
Vasiylik kengashi raisi har chorakda Jamg‘arma daromadlari va xarajatlari ijrosi to‘g‘risida xalq deputatlari tuman (shahar) kengashiga hisobot beradi.
Yoshlar ishlari agentligining tuman (shahar) bo‘limi jamg‘armaning ishchi organi hisoblanadi.
Jamg‘armaning joriy yilda foydalanilmay qolgan mablag‘lari keyingi yilga o‘tadi va tuman (shahar) mahalliy budjetiga olib qo‘yilmaydi.
Bundan avval O‘zbekistondagi ehtiyojmand oilalarning yoshlari “Vatanparvar” avtomaktablarida bepul o‘qishlari mumkin bo‘lishi, Farg‘onada “Yoshlar daftari”ga kiritilgan 303 nafar ishsiz yoshga dehqonchilik uchun yer berilgani hamda Shavkat Mirziyoyev “Yoshlar daftari”ga kirgan 100 ming nafar yigit-qiz haftalik o‘quv kurslarida o‘qitilishini ma’lum qilgani haqida xabar berilgandi.
Izoh (0)