Президент Шавкат Мирзиёевнинг таклифига биноан Қирғизистон президенти Садир Жапаров 11 март куни давлат ташрифи билан Ўзбекистонга келди, деб хабар беради ЎзА.
Таъкидланишича, Ислом Каримов номидаги Тошкент халқаро аэропортида олий мартабали меҳмонни бош вазир Абдулла Арипов кутиб олган.
Маълум қилинишича, 11 март куни Кўксарой қароргоҳида икки мамлакат етакчилари Ўзбекистон–Қирғизистон дўстлик, яхши қўшничилик ва стратегик шериклик муносабатларини янада ривожлантириш ва мустаҳкамлаш масалаларининг барча йўналишларини кўриб чиқиши кутилмоқда.
Давлат раҳбарлари учрашуви кун тартибидан конструктив сиёсий мулоқотни давом эттириш, савдо, саноат, транспорт, энергетика, қишлоқ ва сув хўжалиги соҳаларида кўп қиррали ҳамкорликни кенгайтириш, парламентлараро ва ҳудудлараро алоқаларни фаоллаштириш ўрин олган.
Эслатиб ўтамиз, 22 февраль куни Қирғизистон ташқи ишлар вазирининг биринчи ўринбосари Нуран Ниёзалиев ва Ўзбекистон ташқи ишлар вазирининг биринчи ўринбосари Фарҳод Арзиев иштирокидаги видеоконференцалоқада ташрифга тайёргарлик кўриш ва уни ўтказиш масалалари муҳокама қилинганди. 27 февраль куни Абдулазиз Комилов Қирғизистон президенти Садир Жапаров билан учрашиб, унга Шавкат Мирзиёев мактубини топширганди.
Маълумот учун, Садир Жапаров Қирғизистон президенти сифатидаги илк чет эл сафарини 24—25 февраль кунлари Россияга амалга оширган.
Изоҳ (0)