Тошкент шаҳрининг бозор ва савдо комплексларида ундириладиган янги йиғим миқдорлари тасдиқланди

Тошкент шаҳар ҳокими томонидан 2021 йил 19 февралдаги «Тошкент шаҳридаги бозорлар ва савдо комплексларининг маъмурияти томонидан ундириб олинадиган бир марталик йиғимлар, ижара тўловлари ва кўрсатиладиган хизматлар қийматининг янги миқдорларини жорий этиш тўғрисида»ги 203-сон қарор имзоланди.

«Маҳаллий давлат ҳокимияти органлари тўғрисида»ги қонуннинг 25-моддасига ва «Муниципал активлар бошқармаси маркази» ДУК мурожаатига мувофиқ қуйидагилар тасдиқланган:

• бозорлар ва савдо комплексларининг маъмурияти томонидан ундириб олинадиган бир марталик йиғимлар миқдорлари;
• Сергели автомобиль бозори («Истеъмолда бўлган транспорт воситалари ва эҳтиёт қисмлар Сергели бозори» МЧЖ), «Ўрикзор» савдо комплекси («Ўрикзор савдо комплекси» МЧЖ) маъмурияти томонидан кўрсатиладиган хизматлар қиймати ва ижара тўлови миқдорлари;
• бозорлар ва савдо марказлари маъмуриятлари томонидан кўрсатиладиган хизматлар қиймати ва инвентар ижараси учун тўлов миқдорлари;
• бозорлар ва савдо марказлари балансидаги бинолар ва иншоотлардан фойдаланганлик учун ижара тўлови миқдорлари;
• бозорлар ва савдо комплекслари ҳудудида жамоат объектларига хизмат кўрсатиш ва уларни қўриқлаш бўйича мажбурий хизматлар учун ундириладиган тўлов миқдорлари.

Хусусан, пойтахт бозорлари ва савдо комплекслари маъмурияти томонидан ундириб олинадиган бир марталиқ йиғимлар миқдорига кўра, мевалар билан савдо қилувчилар кунига бир ўрин учун 10 минг сўм тўлашлари керак (цитрус мевалар билан савдо қилувчилар — 22 минг, қуруқ мевалар учун — 19 минг). Сабзавотлар билан савдо қилувчилар эса кунига бир ўрин учун 7 минг сўм тўлайди, иссиқхонада етиштирилган помидор ва бодринг сотувчилар — 13 минг сўм.

Бундан ташқари, Сергели автомобиль бозорида автотранспорт воситаларини сотиш учун сотув ҳудудларидан ҳафтанинга жума куни соат 17:00 дан якшанба куни соат 17:00 гача фойдаланганлиги учун ҳар бир автомобилдан ундириладиган тўлов ҳам тасдиқланган. Унга кўра, енгил автомашиналар ва микроавтобуслар учун усти ёпиқ сотиш жойларидан — 1 донаси учун 40 минг сўм; юк автомашиналари, автобуслар, тракторлар ва бошқа юк кўтарувчи транспорт воситаларини сотиш жойларидан — 1 донаси учун 45 минг сўм.

Аввалроқ Ўзбекистонда чакана савдо дўконлари ижараси нархи 17 фоизга ўсгани тўғрисида хабар берилганди.