Sankt-Peterburgning Shushari qishlog‘ida O‘zbekiston fuqarosi bo‘lgan 29 yoshli ayol o‘ldirib ketildi, deb xabar bermoqda “Piter.TV”. Ayol ushbu qishloqdagi xonadonlarning birida bir necha pichoqlanish jarohatlari bilan topilgan bo‘lib, bu haqda politsiyaga 8-mart kuni ma’lum qilingan.
“Nevskiye Novosti”ning yozishicha, ayol Sankt-Peterburg va Leningrad viloyatida ro‘yxatda turmagan. Rossiyaga ishlash uchun 2019-yilda kelgan. “Federalnoye agentstvo novostey” uning hech qayerda ishlamaganini qayd etgan.
Qotillikda O‘zbekiston fuqarosi bo‘lgan 22 yoshli yigit gumonlanib, qo‘lga olingan. U ham bu hududda ro‘yxatda turmagan.
Voqea joyidan ikkita pichoq, mobil telefon, bank plastik kartasi, biomateriallar va murdaning kiyimlari ashyoviy dalil sifatida olingan.
Qotillik sabablari hozircha noma’lum. Holat yuzasidan jinoyat ishi qo‘zg‘atish masalasi ko‘rilmoqda.
Avvalroq Sankt-Peterburgda novvoy bo‘lib ishga joylashmoqchi bo‘lgan o‘zbekistonlik erkak vafot etgani, Sankt-Peterburgda O‘zbekiston fuqarosi bo‘lgan er-xotin qullikdan qutqarilgani haqida xabar berilgan edi.
Izoh (0)