Арманистон парламент биноси олдида намойишчилар ҳамда полиция ўртасида тўқнашувлар кузатилди

Арманистонда мамлакат бош вазири Никол Пашиняннинг рақиблари Еревандаги парламент биносига кириш йўлини ёпишга уриниши оқибатида намойишчилар ҳамда полиция ўртасида тўқнашувлар кузатилди. Бу ҳақда «РБК» хабар берган.

Мухолифатнинг «Ватанни қутқариш ҳаракати» партиясининг ягона номзоди Вазген Манукян одамларни парламент биносига кириш йўлини ёпишга чорлаган, деб ёзмоқда «Арменпресс».

«Бино ёнига чодир тикамиз ва ҳеч бир депутатнинг ичкарига киришига йўл қўймаймиз. Биз миллий мажлислар ўтказиладиган ҳудудни ўраб оламиз, улар халқни қониқтирадиган қарор қабул қилинганидан кейингина ишлаши мумкин», — дея Манукян сўзларини келтирган агентлик.

«Интерфакс»нинг хабар қилишича, юзлаб намойишчилар Демирчян ва Баграмян кўчаларида парламентга кириш ва чиқиш йўлини ёпишга уринган. Ҳуқуқ-тартибот идораларининг ходимлари аввалига норозилик билдираётганларга қарши ҳеч қандай чора кўрмаган, бироқ муайян вақт ўтгач, полиция ва намойишчилар ўртасида тўқнашувлар кузатилган.

«Sputnik Арманистон»нинг қайд этишича, полиция намойишчиларнинг бир нечтасини ҳибсга олган. Шунингдек, парламент биносига кириш йўллари полиция томонидан темир тўсиқлар билан ўралган.

«Ватанни қутқариш ҳаракати»нинг координатори Ишхан Сагателян мухолифатнинг парламентга бостириб кириш нияти йўқлигини билдирган ва намойишчилардан провакацияларга алданмасликни сўраган.

Арманистон мухолифати 8 февралда бош вазир Никол Пашиняндан истеъфо беришни талаб қилган. Мухолифат ҳукумат раҳбарини 2020 йил 10 ноябрда Тоғли Қорабоғдаги низони ҳал этишда Озарбайжон билан сулҳ тузиб, халққа хиёнат қилганликда айбламоқда. Пашиняннинг ўзи тинчлик шартномасини тузиш ва ҳудудни қўшни давлатга беришдан бошқа чораси бўлмаганини айтиб ўтган. Пашинян истеъфога чиқмагач, мухолифат 20 февралдан бошлаб ҳукуматга қарши оммавий норозилик намойишлари ўтказишни ваъда қилган.

Аввал 1 мартда Арманистонда бош вазирга қарши намойишчилар ҳукумат биносига бостириб киргани, кейинчалик Ереванда полиция Арманистон президенти Армен Саркисяннинг қароргоҳини қатъий қўриқлов остига олгани ҳақида хабар берилганди.