Туркия ташқи ишлар вазири Мевлут Чавушўғли бошчилигидаги делегация Ўзбекистонга ташриф буюриб, Хива, Бухоро ҳамда Самарқанд шаҳарларида бўлди. Бу ҳақда Туризмни ривожлантириш давлат қўмитаси хабар қилди.
Хива шаҳрига 6 март куни ташриф буюрган туркиялик меҳмонлар тантанали равишда кутиб олинди. Туркия делегациясига Ўзбекистон бош вазири ўринбосари – Туризмни ривожлантириш давлат қўмитаси раиси Азиз Абдуҳакимов, ташқи ишлар вазири Абдулазиз Комилов ва Хоразм вилояти ҳокими Фарҳод Эрманов ҳамроҳлик қилди.
Очиқ осмон остидаги музей шаҳар ҳисобланган Хивадаги Ичан Қалъа мажмуасида улар учун маданий тадбирлар ташкил этилиб, Хоразм вилояти қўғирчоқ театри жамоасининг 58-хон театрлаштирилган томошаси намойиш этилди.
Таъкидланишича, Туркия билан ҳамкорликда ишланган «Мендирман Жалолиддин» тарихий сериали намойишидан сўнг Хива хонлиги ва воҳа тарихига катта қизиқиш уйғонгани меҳмонлар томонидан алоҳида эътироф этилди.
Шундан сўнг Туркия ташқи ишлар вазири Мевлут Чавушўғли бошчилигидаги делегация Бухорога ташриф буюрди.
Бу ерда меҳмонлар Пойи Калон мажмуаси, Мир Араб мадрасаси, Лаби Ҳовуз комплекси каби қатор диққатга сазовор масканларда бўлишди. Улар маҳаллий ҳунармандлар билан учрашиб, уларнинг миллий маҳсулотлари билан яқиндан танишди. Бундан ташқари, Арк қўрғонида театрлаштирилган саҳна кўринишлари туркиялик меҳмонлар эътиборига ҳавола этилди.
Туркия делегацияси вакиллари 7 март куни Самарқандга келди ва бу ерда Туркиянинг Бош консулхонаси очилишида иштирок этди. Консулхонанинг очилиш маросимида Туркия ТИВ раҳбари Мевлут Чавушўғли, Ўзбекистон бош вазири ўринбосари Азиз Абдуҳакимов, Ўзбекистон ТИВ раҳбари Абдулазиз Комилов ҳамда Самарқанд вилояти ҳокими Эркинжон Турдимов қатнашди.
Таъкидланишича, Бош консулхона икки мамлакат ўртасида маданий-гуманитар, туризм соҳаларида ҳамкорликни кучайтириш ва ҳудудлараро алоқаларнинг ривожланишига ижобий туртки беради.
Маълум қилинишича, 2018 йилда тарихда илк бор Истанбул–Самарқанд йўналишидаги авиапарвозлар йўлга қўйилган. Пандемия сабабли қўйилган чекловлар доирасида вақтинча тўхтатилган бу рейс яқин вақтларда қайта очилади.
Қайд этилишича, турк халқида Имом Ал-Бухорий, Имом Ал-Мотурудий, Амир Темур, Мирзо Улуғбек каби алломаларга бўлган қизиқиш жуда катта, бу мамлакатдан тарихий шаҳарларга зиёрат мақсадида келаётган сайёҳлар сони тобора ортмоқда.
Бундан аввал Туркиянинг Ўзбекистондаги янги элчиси иш бошлагани, Анқарада Муҳаммад ал-Хоразмий шарафига ёдгорлик ўрнатилгани ҳамда Шавкат Мирзиёев Ражаб Тоййиб Эрдўғонни туғилган куни билан табриклагани ҳақида хабар берилганди.
Изоҳ (0)