“Xotira kundaligi” filmi yulduzi Reychel Makadams nega ekranlarda ko‘rinmay qoldi? (foto)

Oddiygina oilada dunyoga kelib, aktyorlik zinapoyasining eng yuqori qismiga ko‘tarilgan, Gollivud orzusining hayotiy timsoliga aylangan aktrisa Reychel Makadams nega ekranlarda ko‘rinmay qoldi?

Maftunkor Reychel Makadamsning karyerasiga faqatgina havas qilish mumkin. Bir necha yil ichida u kanadalik qizdan Gollivud yulduziga aylangan edi. Uning karyerasida juda ko‘p yorqin obrazlar mavjud, aksariyat muxlislar uni “Xotira kundaligi” hamda “Sherlok Xolms” filmida yaratgan obrazlaridan yaxshi eslaydi.

Bo‘lajak yulduz Kanadada, sahnadan ancha uzoq oilada dunyoga kelgan. Uning otasi yuk mashinasi haydovchisi, onasi esa hamshira bo‘lgan. Reychel yoshligidanoq jo‘shqin tabiatga ega qiz edi. Shuning uchun uning ota-onasi figurali uchish to‘garagiga bergan. Ehtimol, sport unga qat’iylikni o‘rgatgan bo‘lishi mumkin. U hayotga bo‘lgan muhabbatni yo‘qotmasdan, oldiga maqsad qo‘yishni va qiyinchiliklarga bardoshli bo‘lishni o‘rgangan.

Bundan tashqari, Reychelga kutilmaganda jamoat oldiga chiqish ma’qul kelgan va o‘zini teatr tomoshalarida sinab ko‘rishga qaror qilgan. Maktabda namoyish etilgan ilk spektakllardan keyin Reychel aktrisa bo‘lishni orzu qila boshlagan. Torontodagi York institutining teatr san’ati yo‘nalishini imtiyozli diplom bilan yakunlagandan so‘ng, u kino olamiga qadam bosgan.

Uning aktrisalik karyerasining boshlanishi ko‘plab kasting va tanlovlardan iborat bo‘lib, ularning aksariyati “biz siz bilan bog‘lanamiz” degan ibora bilan tugagan. Umuman olganda, hammasi minglab aktrisalarning hayoti singari sodir bo‘lgan, ularning aksariyati hech qachon kino olamida o‘z karyerasiga ega ham bo‘lmagan.

Ammo Reychelda jozibali tashqi ko‘rinish bilan birga, aktyorlik mahorati hamda qat’iyat ham bor edi. Shuning uchun u umidsizlikka tushmagan va orzulari sari olg‘a qadam bosgan. Oradan ko‘p o‘tmay “Yer. So‘nggi ziddiyat” serialidan taklif tushgan.

Aktrisa “Mening ismim Tanino” va “Mukammal shirinlik” filmlariga suratga tushganidan keyin Los-Anjelesni zabt etish uchun yo‘l olgan. Tomoshabinlarning esida qolgan birinchi roli “Zanjir” filmidagi mashhur komik aktyor Rob Shnayder bilan ijrosi edi.

Keyinchalik u “Xotira kundaligi” filmidagi ijrosi tufayli dramatik aktrisa sifatida tanila boshlagan. Ta’sirchan sevgi hikoyasi va Reychelning aktrisalik mahorati tanqidchi va rejissorlarning yosh aktrisaga boshqacha qarashga majbur qilgan.

Ushbu filmdan keyingina aktrisa chinakamiga mashhurlikka erishgan va uning hayoti ham tubdan o‘zgarib ketgan. Gosling bilan munosabatlar suratga olish ishlaridan keyin ham davom etgan. Juftlikning umumiy jihatlari juda ko‘p edi, ularning ikkisi ham bir oyda Ontario shahridagi Sent-Jozef kasalxonasida tug‘ilgan. Shuningdek, ikkisining ham kelib chiqishi kanadalik edi. Ammo bir necha yillik hayotdan so‘ng juftlik ajralishga qaror qilgan. Oradan yillar o‘tib, Reychel va Gosling yana munosabatlarni tiklashga harakat qildi, ammo bu bir necha oygina davom etgan.

Afsuski, bu davr aktrisa uchun muvaffaqiyatli kechmagan. Uni taniqli loyihalarga taklif etishar, ammo turli sabablarga ko‘ra, rolga tasdiqlanmas edi.

Ammo bu bilan aktrisa tushkunlikka tushib qolmagan, u yanada ko‘proq irodali bo‘lishga intilgan. Ikki yil davomida bir necha filmlarda rol ijro etgan bo‘lsa-da, “Sherlok Xolms” kartinasi unga muvaffaqiyat keltirdi.

Shundan so‘ng u “Xayrli tong”, “Qasamyod” va “Kelajakdagi do‘st” kabi filmlarda suratga tushgan. Taniqli rejissor va aktyorlar bilan suratga olish maydonchasida ishlayotgan aktrisa har safar o‘z muxlislarini yangi obrazlar bilan hayratga solar edi. Tomoshabinlar ham uni intiqlik bilan kutgan.

Aktrisa mashhurlikning cho‘qqisida ekranlardan g‘oyib bo‘lib, yana hammani hayratga soldi. Uning uzoq vaqt yo‘q bo‘lib ketishi sababi ko‘pchilik muxlislarni o‘yga toldirdi. Ammo hammasi kutilmagandek bo‘lib chiqdi. Reychel 39 yoshida ona bo‘lishga qaror qilgan edi. U uzoq vaqt mobaynida bunga jur’at etmagan. Bundan tashqari, Reychel hamda uning turmush o‘rtog‘i Jeymi Linden farzand kutayotganini matbuotdan yashirgan. 2020-yilning yozida aktrisaning homilador holatida tushgan suratlari paydo bo‘ldi, ammo bu borada hech qanday rasmiy bayonotlar berilmagan.

Hozirda 42 yoshni qarshi olgan aktrisa onalik quvonchidan bahramand bo‘lgan holda yangi rollarga tayyorgarlik ko‘rmoqda.