«Хотира кундалиги» фильми юлдузи Рэйчел Макадамс нега экранларда кўринмай қолди? (фото)

Оддийгина оилада дунёга келиб, актёрлик зинапоясининг энг юқори қисмига кўтарилган, Голливуд орзусининг ҳаётий тимсолига айланган актриса Рэйчел Макадамс нега экранларда кўринмай қолди?

Мафтункор Рэйчел Макадамснинг карьерасига фақатгина ҳавас қилиш мумкин. Бир неча йил ичида у канадалик қиздан Голливуд юлдузига айланган эди. Унинг карьерасида жуда кўп ёрқин образлар мавжуд, аксарият мухлислар уни «Хотира кундалиги» ҳамда «Шерлок Холмс» фильмида яратган образларидан яхши эслайди.

Бўлажак юлдуз Канадада, саҳнадан анча узоқ оилада дунёга келган. Унинг отаси юк машинаси ҳайдовчиси, онаси эса ҳамшира бўлган. Рэйчел ёшлигиданоқ жўшқин табиатга эга қиз эди. Шунинг учун унинг ота-онаси фигурали учиш тўгарагига берган. Эҳтимол, спорт унга қатъийликни ўргатган бўлиши мумкин. У ҳаётга бўлган муҳаббатни йўқотмасдан, олдига мақсад қўйишни ва қийинчиликларга бардошли бўлишни ўрганган.

Бундан ташқари, Рэйчелга кутилмаганда жамоат олдига чиқиш маъқул келган ва ўзини театр томошаларида синаб кўришга қарор қилган. Мактабда намойиш этилган илк спектакллардан кейин Рэйчел актриса бўлишни орзу қила бошлаган. Торонтодаги Йорк институтининг театр санъати йўналишини имтиёзли диплом билан якунлагандан сўнг, у кино оламига қадам босган.

Унинг актрисалик карьерасининг бошланиши кўплаб кастинг ва танловлардан иборат бўлиб, уларнинг аксарияти «биз сиз билан боғланамиз» деган ибора билан тугаган. Умуман олганда, ҳаммаси минглаб актрисаларнинг ҳаёти сингари содир бўлган, уларнинг аксарияти ҳеч қачон кино оламида ўз карьерасига эга ҳам бўлмаган.

Аммо Рэйчелда жозибали ташқи кўриниш билан бирга, актёрлик маҳорати ҳамда қатъият ҳам бор эди. Шунинг учун у умидсизликка тушмаган ва орзулари сари олға қадам босган. Орадан кўп ўтмай «Ер. Сўнгги зиддият» сериалидан таклиф тушган.

Актриса «Менинг исмим Танино» ва «Мукаммал ширинлик» фильмларига суратга тушганидан кейин Лос-Анжелесни забт этиш учун йўл олган. Томошабинларнинг эсида қолган биринчи роли «Занжир» фильмидаги машҳур комик актёр Роб Шнайдер билан ижроси эди.

Кейинчалик у «Хотира кундалиги» фильмидаги ижроси туфайли драматик актриса сифатида танила бошлаган. Таъсирчан севги ҳикояси ва Рейчелнинг актрисалик маҳорати танқидчи ва режиссёрларнинг ёш актрисага бошқача қарашга мажбур қилган.

Ушбу фильмдан кейингина актриса чинакамига машҳурликка эришган ва унинг ҳаёти ҳам тубдан ўзгариб кетган. Гослинг билан муносабатлар суратга олиш ишларидан кейин ҳам давом этган. Жуфтликнинг умумий жиҳатлари жуда кўп эди, уларнинг иккиси ҳам бир ойда Онтарио шаҳридаги Сент-Жозеф касалхонасида туғилган. Шунингдек, иккисининг ҳам келиб чиқиши канадалик эди. Аммо бир неча йиллик ҳаётдан сўнг жуфтлик ажралишга қарор қилган. Орадан йиллар ўтиб, Рэйчел ва Гослинг яна муносабатларни тиклашга ҳаракат қилди, аммо бу бир неча ойгина давом этган.

Афсуски, бу давр актриса учун муваффақиятли кечмаган. Уни таниқли лойиҳаларга таклиф этишар, аммо турли сабабларга кўра, ролга тасдиқланмас эди.

Аммо бу билан актриса тушкунликка тушиб қолмаган, у янада кўпроқ иродали бўлишга интилган. Икки йил давомида бир неча фильмларда роль ижро этган бўлса-да, «Шерлок Холмс» картинаси унга муваффақият келтирди.

Шундан сўнг у «Хайрли тонг», «Қасамёд» ва «Келажакдаги дўст» каби фильмларда суратга тушган. Таниқли режиссёр ва актёрлар билан суратга олиш майдончасида ишлаётган актриса ҳар сафар ўз мухлисларини янги образлар билан ҳайратга солар эди. Томошабинлар ҳам уни интиқлик билан кутган.

Актриса машҳурликнинг чўққисида экранлардан ғойиб бўлиб, яна ҳаммани ҳайратга солди. Унинг узоқ вақт йўқ бўлиб кетиши сабаби кўпчилик мухлисларни ўйга толдирди. Аммо ҳаммаси кутилмагандек бўлиб чиқди. Рэйчел 39 ёшида она бўлишга қарор қилган эди. У узоқ вақт мобайнида бунга журъат этмаган. Бундан ташқари, Рэйчел ҳамда унинг турмуш ўртоғи Жейми Линден фарзанд кутаётганини матбуотдан яширган. 2020 йилнинг ёзида актрисанинг ҳомиладор ҳолатида тушган суратлари пайдо бўлди, аммо бу борада ҳеч қандай расмий баёнотлар берилмаган.

Ҳозирда 42 ёшни қарши олган актриса оналик қувончидан баҳраманд бўлган ҳолда янги ролларга тайёргарлик кўрмоқда.