Klassik va noyob avtomobillarni sotishga ixtisoslashgan Gullwing Motor Cars avtosaloni 1962-yilda ishlab chiqarilgan achinarli ahvoldagi Maserati 3500 GT’ni 225 ming dollarga sotishga muvaffaq bo‘ldi. So‘nggi 43 yil davomida noyob sport-kupe garajda harakatsiz turgani sabab uning kuzovi va interyeri yaroqsiz holga kelib qolgan, deb xabar beradi Motor.
Maserati 3500 GT birinchi bor 1957-yili Jeneva avtosalonida namoyish etilgan. Mazkur model Italiya markasining oddiy yo‘llarga mo‘ljallangan birinchi avtomobili hisoblanadi. Bunga qadar kompaniya faqat poyga mashinalarini ishlab chiqarish bilan shug‘ullangan. O‘tgan davr mobaynida konveyerdan ikki mingdan kamroq 3500 GT modeli chiqqan bo‘lib, ular orasida kupe va kabrioletlar mavjud.
Sotuvga qo‘yilgan nusxa 1962-yilga tegishli. Sotuvchining so‘zlariga ko‘ra, fil suyagi rangidagi kuzov va qizil charm bilan qoplangan salonga ega 3500 GT’dan bir necha nusxa ishlab chiqarilgan, xalos. Biroq sport kupesining hashamatidan deyarli hech narsa qolmagan. Qachonlardir eksklyuziv bo‘lgan avtomobil atrofini deyarli butunlay zang bosgan, alvon o‘rindiqlar esa singan va ayrim joylari yirtilgan.
Noyob Maserati’ning bu kabi holatga tushib qolishi ajablanarli emas. So‘nggi 43 yilda avtomobil garajda saqlangan. 3500 GT’ning so‘nggi egasi kim bo‘lgani va u nima sababdan yarim asrga yaqin qarovsiz qolgani noma’lum. Model kapoti ostidan 220 ot kuchiga ega 3,5 litrli V6 dvigateli o‘rin olgan bo‘lib, agregat besh pog‘onali mexanik uzatmalar qutisi yordamida ishlaydi.
59 yillik Maserati 3500 GT’ning yangi egasini ismi ham oshkor etilmagan. Bitim qiymati 225 ming dollarni tashkil etgan. Biroq uning yangi egasi endilikda ikki eshikli kupeni qayta tiklash uchun ancha mablag‘ va vaqt sarflashiga to‘g‘ri keladi.
Avvalroq Avstraliyada 63 yillik zang bosgan noyob Porsche yangi 911 narxida sotilgani to‘g‘risida xabar berilgandi.
Izoh (0)