Классик ва ноёб автомобилларни сотишга ихтисослашган Gullwing Motor Cars автосалони 1962 йилда ишлаб чиқарилган ачинарли аҳволдаги Maserati 3500 GT’ни 225 минг долларга сотишга муваффақ бўлди. Сўнгги 43 йил давомида ноёб спорт-купе гаражда ҳаракатсиз тургани сабаб унинг кузови ва интерьери яроқсиз ҳолга келиб қолган, деб хабар беради Motor.
Maserati 3500 GT биринчи бор 1957 йили Женева автосалонида намойиш этилган. Мазкур модель Италия маркасининг оддий йўлларга мўлжалланган биринчи автомобили ҳисобланади. Бунга қадар компания фақат пойга машиналарини ишлаб чиқариш билан шуғулланган. Ўтган давр мобайнида конвейердан икки мингдан камроқ 3500 GT модели чиққан бўлиб, улар орасида купе ва кабриолетлар мавжуд.
Сотувга қўйилган нусха 1962 йилга тегишли. Сотувчининг сўзларига кўра, фил суяги рангидаги кузов ва қизил чарм билан қопланган салонга эга 3500 GT’дан бир неча нусха ишлаб чиқарилган, халос. Бироқ спорт купесининг ҳашаматидан деярли ҳеч нарса қолмаган. Қачонлардир эксклюзив бўлган автомобиль атрофини деярли бутунлай занг босган, алвон ўриндиқлар эса синган ва айрим жойлари йиртилган.
Ноёб Maserati’нинг бу каби ҳолатга тушиб қолиши ажабланарли эмас. Сўнгги 43 йилда автомобиль гаражда сақланган. 3500 GT’нинг сўнгги эгаси ким бўлгани ва у нима сабабдан ярим асрга яқин қаровсиз қолгани номаълум. Модель капоти остидан 220 от кучига эга 3,5 литрли V6 двигатели ўрин олган бўлиб, агрегат беш поғонали механик узатмалар қутиси ёрдамида ишлайди.
59 йиллик Maserati 3500 GT’нинг янги эгасини исми ҳам ошкор этилмаган. Битим қиймати 225 минг долларни ташкил этган. Бироқ унинг янги эгаси эндиликда икки эшикли купени қайта тиклаш учун анча маблағ ва вақт сарфлашига тўғри келади.
Аввалроқ Австралияда 63 йиллик занг босган ноёб Porsche янги 911 нархида сотилгани тўғрисида хабар берилганди.
Изоҳ (0)