Prezident Shavkat Mirziyoyev 22—23-yanvar kunlari Buxoro viloyatiga amalga oshirgan safari davomida “Nizomiy” mahallasida qurilgan zamonaviy uylarni borib ko‘rgani haqida xabar berilgan edi. Tashrif davomida davlat rahbari Hotamovlar xonadoniga tashrif buyurib, mehmon bo‘lgandi. Hotamovlar oilasi a’zolari Prezident matbuot xizmati tomonidan tayyorlangan “Xalq bilan” loyihasi doirasida Shavkat Mirziyoyev bilan uchrashuvi haqida so‘zlab berdi.
“Portret qildirdik (Prezident bilan tushgan suratlarini — tahr.). Kirmasdan turib, oyoq kiyimlarini yechishni boshladilar, menga noqulay bo‘ldi. Men ‘Shavkat Miromonovich, muhtaram Prezident, ‘buyoqqa yechavering’ dedim, qo‘llarini ko‘tarib, ‘yo‘q’ dedilar. Ishonasizmi, podyezdga yechdilar. Oddiy odam ekanlar”, — deydi mehnat faxriysi Ne’mat Hotamov.
Uy egasining nabirasi Gulruh Qurbonova o‘sha kuni Prezidentga choy quyib uzatgani va bundan juda ham hayajonga tushganini so‘zlab berdi: “O‘sha kuni birinchi bo‘lib Prezidentimizga choy quyib uzatdim, qo‘llarimdan oldilar. Juda xursand bo‘ldim, hayajon bo‘ldi”.
E’lon qilingan kadrlardan ko‘rish mumkinki, suhbat davomida xonadon egasi va davlat rahbari dasturxon ustiga ushbu hududlarda amalga oshirilgan ishlar borasida fikr almashgan.
“Bu yerlarda sharoit yo‘q edi. Markaziy suv tizimi bo‘lsa ham kelmasdi… O‘zim qiynalib o‘sganman, qishloqdan chiqqan odamman. Uzoq qishloqdan kelib, darrov o‘qishga kira olmay, mehnatim bilan kirib, odamlarning armonlarini bilganman. Odamlarning qiynalganini bilganman”, — deydi Shavkat Mirziyoyev.
“Xalq bilan” loyihasiga bergan intervyusi davomida xonadon egasi Ne’mat Hotamov pastda turgan rahbarlar ham xuddi shu Prezidentdek ishlasa, O‘zbekiston allaqachon yetakchi davlatlar qatoriga kirgan bo‘lishini qayd etgan.
“Yaxshilik qilish kerak, faqat yaxshilik qilishga shoshilish kerak”, — deya ta’kidlagan Shavkat Mirziyoyev.
“Xudo xohlasa, Prezidentimiz yonlarida senator, deputat yoki yordamchilari bo‘lib ishlamoqchiman”, — deydi nabira.
“Mana shuncha qiyinchiliklarni bosib o‘tdik. Lola (turmush o‘rtoqlari — tahr.) oyog‘imni bosadi ‘ko‘p gapirmang’ deb. Bu kishi ‘domashniy prokuror-da’”, — deydi Ne’mat Hotamov.
Lola Ergasheva kelajakda yana bir marta Prezident bilan uchrashish orzusi borligi ma’lum qilgan.
Izoh (0)