Президент Шавкат Мирзиёев 22—23 январь кунлари Бухоро вилоятига амалга оширган сафари давомида «Низомий» маҳалласида қурилган замонавий уйларни бориб кўргани ҳақида хабар берилган эди. Ташриф давомида давлат раҳбари Ҳотамовлар хонадонига ташриф буюриб, меҳмон бўлганди. Ҳотамовлар оиласи аъзолари Президент матбуот хизмати томонидан тайёрланган «Халқ билан» лойиҳаси доирасида Шавкат Мирзиёев билан учрашуви ҳақида сўзлаб берди.
«Портрет қилдирдик (Президент билан тушган суратларини — таҳр.). Кирмасдан туриб, оёқ кийимларини ечишни бошладилар, менга ноқулай бўлди. Мен ‘Шавкат Миромонович, муҳтарам Президент, ‘буёққа ечаверинг’ дедим, қўлларини кўтариб, ‘йўқ’ дедилар. Ишонасизми, подъездга ечдилар. Оддий одам эканлар», — дейди меҳнат фахрийси Неъмат Ҳотамов.
Уй эгасининг набираси Гулруҳ Қурбонова ўша куни Президентга чой қуйиб узатгани ва бундан жуда ҳам ҳаяжонга тушганини сўзлаб берди: «Ўша куни биринчи бўлиб Президентимизга чой қуйиб узатдим, қўлларимдан олдилар. Жуда хурсанд бўлдим, ҳаяжон бўлди».
Эълон қилинган кадрлардан кўриш мумкинки, суҳбат давомида хонадон эгаси ва давлат раҳбари дастурхон устига ушбу ҳудудларда амалга оширилган ишлар борасида фикр алмашган.
«Бу ерларда шароит йўқ эди. Марказий сув тизими бўлса ҳам келмасди… Ўзим қийналиб ўсганман, қишлоқдан чиққан одамман. Узоқ қишлоқдан келиб, дарров ўқишга кира олмай, меҳнатим билан кириб, одамларнинг армонларини билганман. Одамларнинг қийналганини билганман», — дейди Шавкат Мирзиёев.
«Халқ билан» лойиҳасига берган интервьюси давомида хонадон эгаси Неъмат Ҳотамов пастда турган раҳбарлар ҳам худди шу Президентдек ишласа, Ўзбекистон аллақачон етакчи давлатлар қаторига кирган бўлишини қайд этган.
«Яхшилик қилиш керак, фақат яхшилик қилишга шошилиш керак», — дея таъкидлаган Шавкат Мирзиёев.
«Худо хоҳласа, Президентимиз ёнларида сенатор, депутат ёки ёрдамчилари бўлиб ишламоқчиман», — дейди набира.
«Мана шунча қийинчиликларни босиб ўтдик. Лола (турмуш ўртоқлари — таҳр.) оёғимни босади ‘кўп гапирманг’ деб. Бу киши ‘домашний прокурор-да’», — дейди Неъмат Ҳотамов.
Лола Эргашева келажакда яна бир марта Президент билан учрашиш орзуси борлиги маълум қилган.
Изоҳ (0)