O‘zbekiston Davlat soliq qo‘mitasi tomonidan qo‘shilgan qiymat solig‘i (QQS) to‘lovlarini noqonuniy ravishda kamaytirish maqsadida shubhali operatsiyalarni amalga oshirgan 396 ta tadbirkorlik subyektlarining ro‘yxati e’lon qilingani va ular bilan munosabatlarga kirishgan tadbirkorlarga QQS summasiga o‘zgartirish kiritish va qayta aniqlashtirilgan hisobotlarni taqdim etish yuzasidan xabarnomalar yuborilgani jamoatchilik tomonidan keng muhokama qilinmoqda.

Foto: DSQ matbuot xizmati

Oliy Majlis Senati Budjet va iqtisodiy islohotlar masalalari qo‘mitasi tomonidan mazkur holat yuzasidan tegishli tashkilotlar mutasaddilariga so‘rov yuborilib, nazoratga olinganini ma’lum qildi.

Qayd etilishicha, tez orada so‘rov natijalari, xususan, ushbu holatga qonuniy chora ko‘rilishi haqida batafsil ma’lumot beriladi.

Eslatib o‘tamiz, DSQ xatarlarni tahlil qilish natijasida aniqlangan 396 ta korxonadan iborat shubhali kontragentlar reyestrini tuzdi, shuningdek, soliqlarni kamroq to‘lash maqsadida pul mablag‘larini naqdlashtirish bilan shug‘ullanuvchi “naqdlashtiruvchi korxonalar” xizmatlaridan foydalangan 10 mingga yaqin tashkilotlar ro‘yxatini shakllantirdi.

Ushbu “obnalchi”lar bilan moliyaviy operatsiyalarni amalga oshirgan kompaniyalarning esa QQS summasiga tuzatish kiritildi yoki hisobga olish bekor qilindi. Bu minglab tadbirkorlar noroziligiga sabab bo‘ldi. Ular soliq organlari qarori tufayli ularning ishlari to‘xtab qolgani, ishchilar esa maosh ololmayotganini bildirdi.

Bu holatni biznes-ombudsman o‘rgana boshladi.

“Naqdlashtiruvchi firma”larni aniqlash yuzasidan amaliyotga joriy qilingan yangi mexanizmni aholi va tadbirkorlik subyektlari o‘rtasida tushuntirish ishlarni qoniqarsiz olib borganligi, shuningdek soliq to‘lovchilar bilan yetarli darajada ishni tashkil etmaganligi uchun Toshkent shahar davlat soliq boshqarmasi boshlig‘ining birinchi o‘rinbosari egallab turgan lavozimidan ozod etildi, Toshkent shahar DSB Kameral nazorat va QQS ma’murchiligi bo‘limlari hamda DSQ matbuot xizmati boshliqlariga hayfsan berildi.