O‘zbekistonda ikki oy ichida tabiatga zarar yetkazganlarga 4,33 mlrd so‘m jarima belgilangan

2021-yilning yanvar—fevral oylarida atrof-muhitni muhofaza qilish sohasida 8131 ta qonunbuzarlik holati aniqlangan. Bu haqda AOKAda o‘tkazilgan brifingda Ekologiya va atrof-muhitni muhofaza qilish davlat qo‘mitasi mas’ul xodimi Valijon Ibrohimov ma’lum qildi.

Ma’lum qilinishicha, o‘tgan ikki oy davomida davlat o‘rmon fondiga kirmaydigan 8 mingdan ortiq sharq chinori, eman, qrim qarag‘ayi, chinorsimon zarang, eldar qarag‘ayi, kashtan, shumtol, turang‘il hamda boshqa 20 turdan ortiq qimmatli manzarali daraxt kesishdan saqlab qolingan.

Shuningdek, Ekologiya qo‘mitasi tomonidan respublika miqyosida o‘tkazilgan 9 mingdan ziyod reydlarda ekologiya va atrof-muhitni muhofaza qilish sohasida 8131 ta qonunbuzarlik holati aniqlangan, shundan 96 nafari mansabdor shaxsni tashkil etgan.

Huquqbuzarlarga nisbatan 4 milliard 333 million so‘m jarima va tabiatga yetkazilgan zarar uchun 3 milliard 49 million so‘m da’vo belgilangan.

Bundan tashqari, daraxt va butalarni noqonuniy kesilishi bilan bog‘liq 1021 ta qonunbuzarlik holati aniqlanib, jami 1 ming 650 tup daraxtlar, shundan 768 tup qimmatbaho daraxtlar va 643 metr kub butalar noqonuniy kesilganligi uchun qonunbuzar shaxslarga nisbatan belgilangan tartibda 1 milliard 251 million so‘m ma’muriy jarima va 3 milliard 590 million so‘m o‘simlik dunyosiga yetkazilgan zarar belgilangan.

2020-yil davomida Respublika bo‘yicha jami davlat o‘rmon fondiga kirmaydigan manzarali va mevali daraxtlarning xatlovdan o‘tkazilgan soni 9 million 976 ming 228 tupni tashkil etmoqda. Shuningdek, elektron bazaga kiritilganlari esa 8 million 972 ming 889 tup tashkil etmoqda.

Eslatib o‘tamiz, Ekologiya va atrof-muhitni muhofaza qilish davlat qo‘mitasi daraxtlar va butalarni kesishga moratoriy bir yilga uzaytirilish bo‘yicha Vazirlar Mahkamasiga taklif kiritgan edi. Shuningdek, daraxtlarni noqonuniy kesganlik uchun jarima miqdori ikki baravarga oshirilgandi.